Mizoram-ah North East badminton khawmpui lian

North East Zone Interstate Badminton Championship 2017 chu September 5-8 hian R. Dengthuama Multipurpose Hall-ah khelh a ni dawn a, inelna lian hmachhawn turin Mizoram sorkar leh Mizoram Badminton Association ten inbuatsaihna an kalpui mek.

Badminton Association of India (BAI) hian kum tinin August/September thla hian India ram hmun hrang hrangah zone inelna an buatsaih ṭhin a, zone hi West Zone, East Zone, Central Zone, North Zone, South Zone bakah University Zone-ah te ṭhendarh an ni a. Zone champion te hi an awmna zone aiawhin Inter State National Championship-ah an tel leh ṭhin.

North East bikah hian inelna hi state hrang hrangin an state hming alphabetical order angin an inthlen chhawk ṭhin a, nikum khan Meghalaya-in inelna hi thlengin kuminah Mizoramin an thleng ang a, nakkumah Nagaland-ah nghah a ni thung ang.

Tun hma chuan inelnaah hian men’s team, women’s team, junior boys leh junior girls team a awm ṭhin a. Team championship zawh hnuah Open Championship neih zui nghal a ni ṭhin. Amaherawhchu tun hnai hian BAI chuan a khelh dan format hi thlak danglamin International mixed team championship Sudirman Cup kalphung ang hian neih tawh turin a rawn rel a. 

Tichuan men’s team leh women’s team kha a hranpa a awm tawh loin senior mixed team a ni tawh a. Men’s singles, women’s singles, men’s doubles, women’s doubles leh mixed doubles a awm thung. Junior team inelna pawh pawh hetiang kalphung tho hian kalpui a ni.

Mizoram team chuan June thlatir aṭang khan training an nei ṭan a, August 14 aṭangin inelna neihna hmun tur Mualpuiah residential camp an nei tawh ang. Junior team erawh thlan fel a ni lo a, player 16 thlan chhuah tawh niin thlit fim leh tur a ni.

Mizoram aiawh turte 

Senior Mixed Team : RK Manajit Singh, Lamuanawma, Samuel Lalnunmawia, Lalduhawma, F. Vanlalhriatpuii leh Lalrinzuali te an ni.

Coaching Staff

Manager:Zabiakthara

Assistant Manager:Lalramzauva

Coach:Lalbiaksangi

Assistant Coach:Lalmuanawma



Share this Post

Login to comment
No Comments