Juve-ah Dybala a lungawi

Paulo Dybala chuan a naupan lai aṭangin Juventus jersey number 10 hak chu a duhthusam a nih ṭhin thu a sawi. Argentine forward hian season thar aṭang chuan Juve number 10 a ha dawn.

Tun hmain Omar Sivori, Michel Platini, Roberto Baggio leh Alessandro Del Piero te bakah Paul Pogba ten Juve number 10 hi an lo ha tawh ṭhin a ni.

Turin club tan match 94 a khelh aṭanga goal 42 khungtu Dybala chuan, "Ka jersey number thlak tura min tih khan ka inngaihtuah buai ve hman, mah se number 10 ka ha dawn tih ka hriat kha chuan inngaihtuah nawn a ngai tawh lo. Player ropui leh ṭha tak takin an hak tawh ka ha ve thei tur hi ka lawm a ni," a ti. Dybala hian tun dinhmunah Juventus chu khawvela club ṭha berte zinga mi a nih thu leh Turin-a a hlim thu a sawi tel bawk.

Italian champion hian August 19 zan hian an league match hmasa berah Cagliari an mikhual dawn a, season thar khuhhawn nan Pathianni zan dar 12:15-ah Lazio nen Supercoppa Italiana Final an khel ang.



Share this Post

Login to comment
No Comments