Mbappe tan chhuah a la hun lo - Abidal

France international hlui Eric Abidal chuan tunlaia rawlthar ngaihven hlawh ber pakhat Kylian Mbappe tan club thar neih a la hun loh thu a sawi chhuak.

French chanchinbu pakhat L'Equipe tarlan danin Paris St-Germain chuan Monaco aṭangin kum 18 mi Mbappe lakluh an duh niin an tarlang a, kum nga daih contract ziak turin inremna an siam tawh ni ang an tarlang nasa hle.

Monaco defender hlui Abidal chuan, "Mbappe hian season duhawm tak a hmang tih chu khawvel hriat a ni. Club lian hrang hrangin lakluh an duh hi a mak lo a, thil thlen dan tur pangngai a ni zawk. Inelna liana ṭha taka khel chhuak tur chuan inrintawkna a neih hnem a la ngai a, chuvangin a tan Monaco chhuahsan hi thil tih chi a la ni lo ang," tiin a sawi.

Season hmasa khan Monaco hian PSG lak aṭangin French Ligue 1 nomawi an chhuhsak a, tun season-a an match hmasa berah Toulouse chu 3-2 in an hneh leh tawh - Pathianni zan dar 8:30-ah Dijon FCO an lenchilh ang.

PSG hian an nomawi laklet an duh a, hemi rual hian Champions League-a hlawhtlin an duh bawk. Hlawhtlinna chan leh an tumna kawngah Barcelona aṭangin Neymar chu khawvel palyer manto ber ni turin an la lut.

Pathianni zan dar 12:30-ah PSG hian Guingamp an lenchilh dawn a, he hunah hian Neymar kan la hmuh hmel lo. Neymar hian Ligue 1 khel turin tihfel ngai a la tifel kim lo a, hei vang hian a club thar tana a match hmasa ber khel turin a nghah leh rih a ngai dawn.



Share this Post

Login to comment
No Comments