Hriat hlawh lo player lakah Kerber a tlawm

US Open inbuatsaihna tournament pakhat Rogers Cup khelh mekah hmeichhe world number 1 hlui Angelique Kerber chu seeded pawh chang phak lo Sloane Stephens lakah a chak lo a, last 16-ah a zinkawng a tawp.

American Stephens hian kuminah result ṭha a nei ngai lo hle, Toronto-a inelna an neih hma hian tun season bikah chak ni hmel a hmu miah lo. Mahse, hard court-ah beisei aiin a khel ṭha a, seeded pathumna Kerber hi minute 58 chhung lekin 6-2, 6-2 in a barakhaih; round hmasa lamah seeded 14-na Petra Kvitova a hneh tawh bawk.

Inkhel dangah world number 1 thar Karolina Pliskova chu Japan nula Naomi Osaka nen set hnuhnung ber an khelh zawh hmain a khingpui hi hliam vangin a inhnukdawk. Pliskova hian 6-2, 6-7 (4-7), 1-0 in hnehna a chang ta a ni.

Kum 25 mi Pliskova chuan, "Osaka khan a khel ṭha hle, a bik takin set hnihnaah khan a che fuh thei hle. Hliam a tawrh avangin a pawi ka ti a, hma hun êng tak a nei a ni," tiin a sawi. Pliskova hian world number 1 hlui Caroline Wozniacki a hmachhawn leh ang.

Champion lai Simona Halep pawhin harsatna lian tham a la tawk lo. Romanian nula Halep hian last 16 paltlang turin Barbora Strycova chu darkar khat pawh tling loah 6-1, 6-0 in a sawp.

Lucie Safarova pawhin Russian nula Ekaterina Makarova 6-3, 6-7, 6-2 in a hneh a, inkhel dangah Caroline Garcia, Elina Svitolina chuan Wimbledon champion Garbine Muguruza hmachhawn turin Venus Williams chu 6-2, 6-1 in a hneh ve bawk.



Share this Post

Login to comment
No Comments