Spanish Super Cup Season bul ṭan nan 'El Clasico'

Pathianni zan dar 1:30-ah football khawvel ngaihven El Clasico khelh a ni dawn - Spanish Super Cup-ah Barcelona chuan Real Madrid an hmachhawn dawn a, Spanish football ngainatu tan hei lo liama season bul ṭan dan duhawm zawk a awm chuang thei lo. 

Hmun dang ang lo takin Spanish Super Cup hi two legged-a khelh a ni a, Pathianni zana an inkhelhna hmun tur hi Nou Camp niin August 16 zanah second leg hi Santiago Bernabeu-ah an khel ang. Real Madrid hi La Liga champion an ni a, Barcelona hi Cope del Rey champion an ni thung.

A 'hot' dawn

El Clasico a nih tawh chuan boruak a sang lo ngai lo. Pathianni zan inkhel tur pawh a 'hot' dawn tih a chiang a, club pahnih hian chak loh an duh dawn lo. Pre-season tour-ah club pahnih hi International Champions Cup khelin an lo intawng tawh a, Barcelona-in 3-2 in hnehna an chang.

'Friendly match mai mai' tiin club pahnihin an inkhel hi an thlir kir lo. A tichiang turin Barca coach Ernesto Valverde chuan, "Real nena inkhel kan nih chuan engmah hi a 'friendly' tak tak thei lo," tiin inkhelh zawhah an chak avanga a lawm thu a sawi a, Real boss Zinedine Zidane chuan, "UEFA Super Cup hmaa insiamṭhat kan ngai a ni," a ti thung - Manchester United hnehin Real an insiamṭha tawh a, Barca lakah tlawm an duh lo ang.

Modric tel lohna

Real Madrid-in chanchin lawmawm lo an nei a, chu chu an midfielder pawimawh Luka Modric an chhawr theih loh tur thu hi a ni - hei hi kum thum liam taa thil thleng vang a ni! Kum 2014 khan Real hian Spanish Super Cup-ah Atletico Madrid an ngam lo a, he inkhelah hian Modric hi hnawhchhuah a ni.

Real-in Copa del Rey leh La Liga nomawi an chawi loh vang vang hnuah tun season-ah league champion an ni a, Modric-a red car a 'nung' ve chiah. Croatian midfielder a inlan theih dawn loh takah chuan Real-in an 'neih' dang an melh a ngai a, Modric-a hnampuipa Mateo Kovacic a inlan a rinawm. Real tana chanchin lawmawm erawh United laka minute 10 chiah inlan Cristiano Ronaldo-a'n inkhel bul a ṭan a beiseiawm.

Chak duh Zidane

Real boss Zidane chuan, "Season hautak em emin min hmuak tih kan hria a, kan bul ṭanna tur hi Barcelon a nih avangin a awlsam dawn lo tih a chiang reng. Ṭha takin inpuahchahna kan kalpui a, kan match hnuhnung aia hmasawn zel kan duh a ni," tiin Catalan club lakah Barcelona ṭha zawk inlan pui a tum thu a sawi.

French manager chuan season pumpui thlir nghalin, "Min hneh thei tur khawpa team ṭha hi tam tak an awm a, ṭum dang zawng aiin tun season hi a harsa lehzual ang. Mahse, chak chhunzawm zel tura tuihalna hi kan nei reng a ni," tiin tlawm chunga season bul ṭan a tum lo.

Valverde fiahna

Barcelona-in coach thar Ernesto Valverde enkawlna hnuaiah an khel dawn a, Spanish manager tan Nou Camp-a competitive match-a Barcelona a kaihhruaina hmasa ber tur a ni ang. Athletic Bilbao boss hlui chuan, "Real Madrid hmachhawn turin kan inpeih tawh a ni," a ti a, Nou Camp-a hnehna a chan loh nghal chuan hmingchhiatna nen Barcelona boss nihna bul a ṭan dawn tihna a ni.

Valverde hian a player tawnhriat ngah Andres Iniesta chu training loin chawlh hahdamna hun a pe a, Real a hmachhawn a rinawm loh. Hetihrual hian Rafinha leh Thomas Vermaelen ten club training an zawm thei lo a, academy players Jokin Ezkieta leh Carles Alena te chuan senior team training an zawm.

Neymar tel lohna

Barcelona-in pound maktaduai 200-a Neymar an hralh avangin Brazil captain hming sawilan a ṭul leh ṭhin. Barca-in sum tam tak an neih miau avangin Brazilian forward thlak tur hian Philippe Coutinho leh Ousmane Dembele an dawr ve ve tawh a, an dilna hi hnawl a ni ve ve bawk.

Hetihrual hian Chapecoense nen an inkhelh ṭuma assist vawi hnih neia goal khat khungtu Gerard Deulofeu hming a ri ring viau bawk a, a player chungchang hi sawiin Valverde chuan, "A khelh dawn leh dawn loh ka sawi thei lo a, player tlan chak leh kan ngaihhlut em em erawh a ni," a ti a, kum 53 mi manager hian a neihsa hi Pathianni zana Lionel Messi leh Luis Suarez nena inkawp turin a dah a nih pawhin a mak lo ang.



Share this Post

Login to comment
No Comments