Spurs tan a la tlai lo

Tottenham Hotspur-in tun transfer-ah player lakluh an la nei lo a, manager Mauricio Pochettino chuan player thar an lakluh ngei tur thu a sawi.

Spurs hian season liam ta khan Premier League-ah pahnihna dinhmun an hauh a, Pathianni zan dar 6:00 hian kai thar Newcastle United nen St James' Park-ah an inhmachhawn ang.

Tottenham hian right back Kyle Walker chu an elpui Manchester City lakah an chan tawh a, left back Danny Rose chuan an club-in player ṭha an lalut lo chu a sawisel.

Kum 27 mi Rose hi Manchester United nena sawi zawm a ni a, English left-back chuan, "Ka hlutna zat ka hria a, ka phu ang hi ka hlawh chhuak ngei tur a ni. Ka ṭhat dan ber ka thleng chho tawh a, kum 15 chhung football khel a, nomawi chawi loa tawp ka duh lo," tiin an hlawhah pawh a lungawi lo tih a sawi.

Rose hian kar khatah £65,000 bawr vel a hlawh a, Spurs player zinga hlawh tam  striker Harry Kane leh goalkeeper Hugo Lloris ten £110,000 ve ve an hlawh. Tottenham hian Premier League-a an tlukpui player-te aiin an hlawh tlem a, City zawmtu Walker pawhin kar khatah £150,000 a hlawh a, an lungawi lohna hi a hriatthiam awm hle.

Hetihlai hian club chairman Daniel Levy chuan transfer an la neih loh chhan chu pound maktaduai 750-a White Hart Lane an sak ṭhat vang ni loin an player duh ang an hmuh rih loh vang a nih thu a sawi.

Hemi chungchang zawhna chhangin Pochettino chuan, "Sumdawnna lama ka hriatna hi a tlem em em a, ani hi England-a sumdawng huhang nei lian ber zinga mi a ni a, a thutlukna hi ka zah a ni. Club dang nen kan kalphung a inang tawk lo a, chutihrualin kan nghah theih pawh a ṭul. Player pathum aṭanga pali vel kan mamawh a, position tinah pakhat ṭheuh kan mamawh a ni," tiin player lakluh ngei an tum thu a sawi.

Spurs hian tun hmain August thla tawpah player an lalut tawh ṭhin a, nikuma an lakluh midfielder Moussa Sissoko (£30m) leh winger Georges-Kevin Nkoudou (£9m) te bakah season hmasa lama an lakluh forward Son Heung-min (£22m), Erik Lamela (£25.7m), goalkeeper Hugo Lloris (£11.8m) leh forward Clint Dempsey (£6m) te pawh kha transfer tawp lama an lakluh vek a nih avangin Argentine manager thusawi hi a thlen dik theih a rinawm.

Amaherawhchu Newcastle United khelmual St James' Park an tlawh hunah erawh player thar an la nei hman dawn lo. Hei bakah hian Spurs tan inhliam vangin Kieran Trippier, Son Heung-min, Danny Rose leh Erik Lamela te an la inlan theih a rinawm loh a, Premier League kai thar Newcastle lakah talbuai thei an ni.



Share this Post

Login to comment
No Comments