Mourinho-a'n striker thar Lukaku a chhan

Manchester United-in pre season-a an match hmasa berah LA Galaxy chu 5-2 in an sawp a. Pound maktaduai 75 man striker Romelu Lukaku-a'n goal a khung lo a, inkhelh banah manager Jose Mourinho-a'n a chhan. English club hian July 18, Thawhlehni zing dar 7:30-ah Real Salt Lake an hmachhawn ang a, Ten 2-ah a en theih ang.

United tan Marcus Rashford (2', 20'), Marouane Fellaini (26'), Henrikh Mkhitaryan (67') leh Anthony Martial (72') ten goal an khung a, mual neitu lam hian Giovani dos Santos (79') leh Dave Romney (88') ten mualphona hliah khuhna goal an khung ve bawk.

Pathianni zing inkhelah English club hi kawng hrang hrangah an chungnung vek a, hun tawp lama an tlarhnung phui ṭha lo erawh ngaihtuah tihthui thei a ni thung. 

Pound maktaduai 75 man striker Lukaku chu second half ṭantirhah khawvel player manto ber Paul Pogba ruala rawn inlanin LA Galaxy keeper Jon Kempin ṭum hnih ngawt a malin hmachhawn mah se goal a khung lo. United player zingah Belgian striker Lukaku aia hmuhnawm an tam hle.

Inkhelh banah Mourinho chuan, "Goal a khung lo a ni thei a, amaherawhchu goal khung ho ai khan a khel ṭha zawk," tiin player chhan a pe na hle.

Portuguese manager chuan sawi chhunzawmin, "Ka tana thu lawmawm chu team tan a khel a, ama hming ṭhatna a ngaihtuah lo. Team hmasawn theih nan a thawk a ni," tiin a sawi. Wayne Rooney nena khaikhinin Mourinho chuan, "Khaikhin theih an ni lo. Rooney kha kan tan chuan striker a ni lo a, Lukaku chu target man a ni. Lehlam pawl tlarhnung bulah dingin hmuh a awlsam a, a rang tel bawk," tiin Belgian striker chu an khelh dan aṭanga thlirin Zlatan Ibrahimovic aiawhtu zawk a nih thu a sawi.

United manager Mourinho chuan Real Madrid nen an inrem theih loh vanga Alvaro Morata an lak  theih loh chu pawi a tih thu a sawi a, Cristiano Ronaldo lak pawh a man a to uchuak dawn avangin thil theih loh a nih thu a sawi.

LA Galaxy an hmachhawn hma hian Mourinho chuan, "Player pali lak kan tum a, pahnih kan la tawh. Player ṭha pahnih chu kan la mamawh a, kan la thei lo a nih pawhin pakhat tal chu a la ngai a ni," tiin player an la lak belh tur thu a sawi a, Zlatan Ibrahimovic pawh a la ziahluh leh theih thu a sawi  lang bawk.



Share this Post

Login to comment
No Comments