Blues midfielder thar Bakayoko

Chelsea chuan French champion AS Monaco aṭangin midfielder Tiemoue Bakayoko chu pound maktaduai 40 in an lalut.  Kum 22 mi France international hian Premier League champion tan kum nga daih contract a ziak.

Tun nipui transfer chhungin Blues hian AS Roma aṭangin defender Antonio Rudiger an lalut tawh a, Bakayoko hi an player pahnihna niin ram lama a elpui N’Golo Kante nen inkawp tura ngaih an ni.

Ligue 1 club Rennes aṭang bul ṭantu Bakayoko hian kum 2014 khan Monaco a zawm a, a club tan hian inelna hrang hrangah match 92 khelin goal nga a khung tawh. Season hmasa khan Ligue 1 nomawi a chawi pui bakah Champions League semifinal a hruai thleng bawk.

Tharum ngah tak Bakayoko chuan, "Ka naupan lai aṭanga ka club ṭan tak mai Blues ka zawm thei hi ka lawm a, manager ropui Antonio Conte leh player ropui tak takte nena inkhelh hun ka nghakhleh tawh hle," tiin a sawi.

Chelsea hi season thar inbuatsaih turin vawiin hian China an pan dawn a, striker Diego Costa leh midfielder Nemanja Matic te chu squad-ah an tel ve lo. Player pahnihte hian Stamford Bridge an chhuahsan ngei dawna ngaih a ni.

Kum 28 mi Costa hian a club hlui Atlerico Madrid lama kir leh a duh nia sawi a ni. Mahse, La Liga club hi January thla thleng player thar lalut thei lo tura hrem mek an ni. Serbia international Matic pawh Manchester United-in an ngaihven hle a, Italy lam aṭangin thawm a awm bawk.



Share this Post

Login to comment
No Comments