Giroud-a'n goal a khung

Arsenal chu Premier League season thar inbuatsaih nana an zinna Australia-ah match hnih khelin hnehna an chang ve ve. Manager Arsene Wenger-a'n player a siksawi kual nasa a, an match hmasa zawka bul ṭan lo striker Olivier Giroud-a'n Inrinni tlaiah goal hmahruai a khung.

Gunners hian Giroud, Aaron Ramsey leh Mohamed Elneny te goal hmangin Western Sydney Wanderers chu 3-1 in an hneh. Pound maktaduai 53 man Alexandre Lacazette-a'n a vawi khat nan inkhel bul a ṭan a, Lyon striker hlui hian a match hmasa berah goal khung mah se Sydney Wanderers lakah erawh goal a khung zui lo.

An match hmasa zawka Sydney FC an hneh ṭuma bulṭantu Danny Welbeck aiah Giroud-a'n hmun a chang ve thung a, amah nek chhuak tur anga ngaih Lacazette chu a amah thlawp tura tlantir a ni thung. Season hmasa tawp lam ang bawkin Wenger hian tlarhnung laiah player pathum a chhawr nawn.

Nipui transfer-ah Arsenal-in boruak an nei chho mek a, player pahnih lalut tawhin an neih sa ṭhenkhat zingah Alexis Sanchez leh Oxlade-Chamberlain te dinhmun a nghing nia sawi a ni.

Arsenal manager Wenger chuan Sanchez chungchang sawiin, "Alexis hian contract thar a la ziak lo a, inremna a la awm lo. Chutih tih rualin a laka thu lengvak tam zawk hi chu thu dik lo a ni," tiin a sawi. Wenger hian Chamberlain erawh 100%-in a cham chhunzawm dawn tih a chian thu a sawi.

Arsenal Squad :  (3-4-2-1) Ospina, Koscielny, Elneny, Monreal; Oxlade-Chamberlain, Ramsey, Xhaka, Maitland-Niles; Iwobi, Lacazette; Giroud.

Subs : Martinez; Mertesacker, Ozil, Walcott, Welbeck, Martinez, Kolasinac, Coquelin, Bielik, Nelson, Nketiah, Willock.



Share this Post

Login to comment
No Comments