Mala hoten Ramhlun North an hneh

Lalbiakliana Memorial MFA Super Cup-ah division hnuai zawk club zingah Mizoram Premier League club hneh thei an awm ta. Inrinni khan I League-a Aizawl FC kaipuitu coach K. Malsawmkima kaihhruai AFC Academy chuan Ramhlun North chu an hneh.

First division club AFC Academy hian quarterfinal-ah an senior team Aizawl FC leh Mizoram Police FC chak zawk an hmachhawn dawn. Rajiv Gandhi Stadium-a inkhel dangah Dinthar FC-in harsatna nei loin Chaltlang FC 2-0 in an hneh a, MPL club hian last 16-ah Chite Veng GSA hnehtu Ramthar Veng FC an hmachhawn ang.

Mala a la dam

Beisei loh taka MPL2 final-a Luangmual FC thlenpuitu K. Malsawmkima'n Aizawl FC a enkawl hmasak berah Mizoram league sang berah a champion pui a, I League a kaipui vangin Mizoram pumah a hriat a hlawh.

Amaherawhchu Mizo coach hian I League enkawlna tur khawp certificate a nei lo a, season liam ta ṭantirah erawh Aizawl FC senior team kaihhruaiin I Day Football leh MFA Super Cup-ah nomawi a chawi a, AFC enkawl tura Mumbai FC coach hlui Khalid Jamil an lakluh hnuah Mala'n thawm a nei lo.

Mala team nge nge

Aizawl FC Academy-in MFA Grassroots an hneh ṭuma hnawhchhuah defender pahnih Lalramtiama leh 

Ricky Rohmingliana te an chhawr thei lo chungin Ramhlun North lakah attacking game an khel ngam a, MPL club an talbuai.

AFC Academy tan David Lalthansanga leh Lalremmawia ten chance ṭha bik an hlah a, Ramhlun North inkhel bul ṭantu zingah Lalrinfela, Jessy Vanlalmuana, V. Lalchhuanawma, Rosangliana leh Lalramzauva Khiange te tel mah se chance an insiam thei lo.

Second half-ah Ramhlun North an insiamṭha a, Lalliansanga (Notea) luh hnuah an goal nawr a na lehzual. Aizawl FC Academy naupanna second half-ah lang mah se hun tawpah an him hram a, captain Lallawmawma chuan hun tawp hmain goal line aṭangin a pet chhuak.

Penalty Shootout-ah Ramhlun North keeper Lalrinhlua'n save hmasa mah se MPL club-in an hmang ṭangkai thei lo a, penalty vawi thum dangtu Lawmsangzuala chu AFC Academy chhandamtu niin 4-3 in hnehna an chang.

Dinthar an tlo

MPL champion hmasa ber Dinthar FC-in first division club Chaltlang FC lakah game ṭha ber an lantir lo a, amaherawhchu knockout stage a nih miau avangin coach Lalhlupuia Sailo dem theih a ni lo.

Dinthar FC tan Lalnunsanga (Tale-a) chuan a club thar tan match zawnin a khung a, Samuel Laltlanthanga'n chak nemnghehna a khung bawk. Maimawms hian Zirtawpnia thi an physio C. Lalawmpuia hriatreng nan armband dum an hreng a, Samuel-a chuan a goal khung hi a ṭhianpa leh physio ni bawk Lalawma tan a hlan.



Share this Post

Login to comment
No Comments