Mipa double champion Lukasz Kubot leh Marcelo Melo

Inrinni zan khan Wimbledon mipa doubles final khelh a ni a, Lukasz Kubot leh Marcelo Melo te ṭangdun chuan inkhel inhnehtawk takah Oliver Marach leh Mate Pavic te 5-7, 7-5, 7-6(2), 3-6, 13-11 a hnehin champion nomawi an chawi.

Centre Court-a final khelh chhung rei zawng hi darkar li leh minute 39 zet a ni a, tlaia khelh zawh tura ngaih ni mah se set hnuhnung bera 11-11 a nih laiin light hman a ngai tawh a, ruahsurin a tihbuai loh nan court chung khuh a ni bawk.

Kumin mipa doubles final team pahnihte hian semifinal-ah set nga ve ve khelin hna hautak an paltlang. Seeded 16-na Marach leh Pavic te hian darkar li leh a chanve chhung zetin Croatian tlangval Nikola Mektic leh Franko Skugor te an hneh a, final-ah inkhel rei tak hmachhawn zuiin seeded palina Kubot leh Melo te lakah erawh a vanduai zawkah an ṭang.

Hmeichhe doubles lamah Ekaterina Makarova leh Elena Vesnina te inkawp chuan minute 55 chhung lekin Chan Hao-ching leh Monica Niculescu te ṭangdun 6-0, 6-0 a sawpin nomawi an chawi ve bawk. Makarova leh Vesnina te hian Grand Slam nomawi pathum an chawina chiah a ni.

Tennis tournamnet upa ber Wimbledon doubles champion player te hian £400,000 (Rs.3,36,61,626) ṭheuh zel an dawng a ni.



Share this Post

Login to comment
No Comments