Eubank Jr a dingchang leh ta

Chris Eubank Jr chuan IBO world super-middleweight title a kawl lai chu a humhim - kum 27 mi boxer hian weight division pahnih champion lo ni tawh Arthur Abraham chu unanimous points-in a hneh.

Februay-a title a hlawhchhuah hnua a vawi khat nana a kawnghren humhim tura inhnek Eubank hian hnehna chang turin ring chhungah a thiamna a pholang a, 118-110, 118-110 leh 120-108 a Wembley Arena-a hnehna a chang hi awm lo ti an awm lo ang - Arthur Abraham tan vawi 52 inhnek a hmachhawna vawi ruk a tlawmna chiah a ni thung.

Eubank Jr-a'n inhnek a hmachhawn vawi 26-ah vawi khat chiah tlawm hmel a la hmu a, a khingpui Arthur Abraham a fak hle. British boxer chuan, "Boxer ka hmachhawn tawhah chuan a daih rei ber hialin ka hria. Ka khelh danah erawh ka lawm a, 12 round inhnek thlen ngai mah se tawnhriat ka ngah phah a ni," a ti.

Vawi 26 inhnek a hmachhawna vawi 19 a khingpui knockout thei Eubank hi World Boxing Super Series-ah a inlan chhunzawm dawn. He inelna hi cruiserweight leh super middleweight-ah neih a ni dawn a, weight pahnihah hian boxer pariat ve ve an tel.

Super middleweight-ah hian boxer langsar tak tak WBA champion George Groves, Callum Smith leh Jamie Cox te pawh an inlan dawn a, lawmman atana sum sen ral tur ringawt pawh pound maktaduai 38 a tling a ni.



Share this Post

Login to comment
No Comments