Euro U19 Europe rawlthar zingah England an thiam ber

European Under-19 Championship-ah England aia thiam an awm lo - England U19 hian Inrinni zan khan Portugal U19 chu Euro U19 final-ah 2-1 in an hneh a, champion nomawi an hlawh chhuak.

Young Lions (England youth team sawina) tan Easah Suliman leh Manchester City striker Lukas Nmecha-ten goal khat ve ve an khung a, Portugal goal neihchhun hi Chelsea rawlthar Dujon Sterling-a'n an lama a tihluh palh a ni.

Inkhel chu

Georgia khawpui pakhat Gori-a inkhelah goal hmuh tur a awm lawk lo a, England leh Portugal te a thiam ber nih inchuhin an innawr tawn zak zak. Chelsea rawlthar Mason Mount leh Fulham full back Ryan Sessegnon ten England tan hun duhawm nei mah se goal-ah an chantir thei lo a, goal lut loa chawlhlawk hman a ni.

Chawlhlawk hman a nih hnuah erawh England rawlthar ten goal khung turin minute nga bak an nghah a ngai lo. Aston Villa defender Easah Suliman chuan minute 50-naah goal hmahruai a khung a, minute ruk hnu lawkah Sterling chuan an lamah ti lut palhin Portugal si phurh a sut sak.

Mahse, England-in nomawi chawi loa Georgia chhuahsan an tum lo. Manchester City striker Lukas Nmecha chuan minute 68-naah an goal hnihna a khung a, 2-1 in hma an hruai. Hun tawp nan minute 10 chiah a awm tawh tihin England rawlthar Tayo Edun chu a yellow card pahnihna avanga hnawhchhuah ni mah se England an ṭang tlang a, an champion.

Hmabak eng Lions

English football ngainatute tan kumin hi kum ṭha a ni a, England senior team-in nomawi an chawi hlan nghakhlel taka thlirtuten an rawltharte aṭangin beiseina an nei leh ta - kumina Europe mai ni lo khawvel huap pawha youth football-a roreltu chu England an ni.

Young Lions ten Euro U19 nomawi an chawi leh chiah hian thla hnih chhunga England youth team-in nomawi pathum an chawina chiah a ni - England U19 hma hian Under-20 World Cup leh Toulon Tournament-ah England an champion tawh.

Hei mai hi a la ni lo cheu, thla hmasaa Poland-a European Under 21 Championship khelh zawh takah khan England hian semifinal an lut bawk a, Germany chu penalty-ah ngam loin an vanduai - a tawi zawnga sawi chuan, tun hnaia England youth team-te thlen chin thlirin England hmabak a eng takzet.

St George's Park hnathawh

Football Association-in hmabak thui tak thlirin kum 2012 khan Staffordshire-ah St George's Park an hawng a, he hmun hi junior aṭanga senior team thlengin training nana an hman a ni. FA tum ber chu he hmun hi naupang hmabak nei eng ten inzir nan hmang se, coaching lamah pawh hmasawnna awm se tih hi a ni - kum nga a liam a, a rah an lo ṭan.

England coach Keith Downing chuan, " Football Association-in St George's Park-a sum tam tak an sen rah chu kan seng mek a ni. Tuna kan tihtur pawimawh chu kan hnathawh hi chawlhsan mai loa chhunzawm zel a ni mai. Kum duhawm tak kan hmang a, mahse chawlh erawh a thiang lo," a ti.

Downing chuan sawi chhunzawmin, "Naupang talent nei ṭha tak tak kan enkawl a, ka squad-ah kum 18 hnuai lam player paruk lai awm mah se hun harsaah pawh an talbuai ngai lo. Kan thlen chinah hian duhtawk mai tur kan la ni lo a, hma kan sawn zel a ngai a ni," a ti a, chawlh mai a la tum lo.

England an hlim

Thla hnih chhungin England youth team-in champion nomawi pathum an chawi a, senior team captain Wayne Rooney chu a lawm ber zinga mi a ni. Manchester United aṭanga Everton lama kir hlim striker chuan, "Naute u ka lawmpui takzet che u, England youth team tan chuan nipui duhawm tak a ni," tiin an hun tawn mek chu hlimawm a tih thu a sawi.

Manchester United winger Jesse Lingard chuan, "England U19-in hlawhtlinna an chang hi ka lawmpui takzet a ni," tiin twitter lamah lawmpuina thu a tarlang.

England legend Gary Lineker-a beiseina a sang hle. Leicester City striker hlui chuan, "England-in nomawi kan chawi leh ta. U19 player-te nomawi in chawi avangin ka lawmpui che u a, 'the new Germany' ni turin hun tam kan mamawh tawh lo," a ti - Lineker-a'n youth team aṭanga in din chho Germany hlawhtlinna ang a mitthla a, tuman an dem lo ang.



Share this Post

Login to comment
No Comments