Williams ngamtu Muguruza

Garbine Muguruza chuan darkar khat leh minute 17 chhungin Venus Williams chu 7-5, 6-0 a sawpin a vawi khat nan Wimbledon champion a ni. Spain nula zingah Muguruza hi All England Club-a title la thei pahnihna a ni a, tun kara world ranking chhuak tharah chuan 15-na aṭangin pangnaah a kaisang ang.

Kum 23 mi Muguruza hian 2015 Wimbledon final-ah khan Serena Williams a ngam lo a, season hmasa khan Serena hnehin French Open nomawi a chawi let. Inrinni zana Venus a hneh leh takah chuan Grand Slam final-a Williams unau hneh kawp thei awm chhun a ni ta!

Grand Slam vawi hnih champion tawh Muguruza chuan, "Kum hnih liam ta a ka chak loh ṭum khan Serena khan nakinah chuan ka hun ṭha a la inhawng tur thu min hrilh a, tunah chuan a rawn thleng ta. Ka naupan lai aṭangin Venus inkhel hi ka en ṭhin a, a laka hnehna ka chang mai hi ka lawmin mak ka ti hial zawk," tih thu a sawi lai chuan mipui thawm a ṭha hem hem hle. Venus hian kum 2000-a grand slam a champion hmasak berin Muguruza hi kum sarih mi chauh a la ni.

Aces a thlawn

Centre Court-a inkhelah Grand Slam vawi sarih champion tawh Venus-i'n bul ṭan nan aces a siam nghal a, a khingpui Muguruza bulṭanna erawh double fault a ni thung. Kum 37 mi Venus hi hmeichhe player zingah Open Era bika Grand Slam title la thei upa ber a ni ngei dawnin a lang hman.

Mahse, a tira a lan angin thil a kal zui lo. American star Venus hian set hmasa zawkah 5-4 a hma a hruai laiin set point a hmuh a chhawr ṭangkai lo a, a service hloh chhunzawmin set a hloh. Spain nula Muguruza-i'n set hmasa a lak hnuah hnung lam a hawi tawh lo, game hnuhnung pakua la fai vekin hnehna a chang - point hnuhnung ber hmu turin Hawk-Eye puihna a mamawh thung.

Seeded 10-na Venus chuan, "Vawiin hian Serena ka ngai, hnehna chan tumin ka theihtawp ka chhuah a, mahse hun remchang ka hmu thei ngang lo a ni," tiin a sawi. Venus hian kuminah Grand Slam final vawi hnih a khel tawh a, a chak lo zawkah a ṭang ve ve. Australian Open-ah khan a nau Serena a ngam lo.

A mak!

Spain nula zingah Conchita Martinez (1994) tih lohah chuan Muguruza hi Wimbledon champion leh thei hmasa ber a ni a, tunah chuan Martinez hi coach ni tawhin a kaihhruaina hnuaia khel Muguruza-i'n a hnung a rawn zui ve chiah.

Muguruza chuan, "Hmeichhe tennis khel ṭhinte chuan Venus hi kan entawn nasa hle, a inkhelh dan bakah court pawna a nungchang thlengin entawn tlak a ni. A laka hnehna ka chang thei hi mak ka ti, tournament dang atan pawh inrintawkna ka neih belh nasa khawp ang," a ti.

Hmeichhe tennis player tuna la khel lai zingah Serena Williams chuan Grand Slam nomawi 23 chawi tawhin a champion hnem ber a, a dawtah Venus (7 titles) leh Maria Sharapova (5) te an awm bawk. Anni bakah hian Victoria Azarenka, Angelique Kerber, Svetlana Kuznetsova, Petra Kvitova leh Muguruza te hi vawi hnih ṭheuh an champion ve tawh bawk.

Ngaihnawm

* Final-ah khan Williams khan a service vawi li a hloh a, Muguruza erawhin quarterfinal aṭangin a service vawi khatmah a hloh lo.

* Tun kara world ranking chhuak tharah Muguruza hi number 15 aṭangin panganaah a kai chho dawrh ang.

* Williams-i'n set hmasa berah 5-4 a hma a hruai hnuah Muguruza khan game hnuhnung pakua a la fai vek.

* Final khelh hun chhung kha darkar khat leh minute 17 a ni a, set hnihna khelh chhung kha minute 26 chhung chauh a ni thung - Williams khan point 12 chiah a hmu.

* Williams service hmasa (first serve) nat zawng chu114mph zeta a ni a, mah se 61% chiah a dik. Hetih lai hian Muguruza erawhin service na lo zawk chungin 77% zet a ti dik thung.



Share this Post

Login to comment
No Comments