World Cup khel thei zat a pung

Nimin khan football khawvela thuneitu sang ber FIFA chu Zurich khawpuia FIFA headquarters-ah an ṭhukhawm a, FIFA World Cup-a team tel thei zat 32 chu 48 a tihpun turin lungrual takin an pawm. World Cup-a team 48 tel theih hun tur erawh kum 2026 World Cup aṭang chauhin a ni ang. 

FIFA pawm dan chuan team 48 hi group 16-ah ṭhen hran an ni ang a, group khatah team pathum zel awmin a sang pahnihin last 32 an lut ang. Tournament a match khelh ṭhin pangngai 64 chu 80-ah a pung dawn tihna a ni a, champion team chuan match sarih an khel dawn tihna a ni. Ruahman dan ang chuan World Cup hi ni 32 chhunga khelh zawh tur a ni bawk. FIFA World Cup-a team tel thei zat an tihpun hnuhnung ber chu 1998 World Cup kha a ni.

Engvang nge?

FIFA president Gianni Infantino chuan World Cup-a team tel thei zat tihpun thu hi vawi engemaw zat a lo sawi tawh a, nikum December khan World Cup-a team tel zat tihpun chu 'khawvel pumpuia football hmasawn zel nan a pawimawh a ni' tiin a lo sawi tawh.

World Cup-a team tel thei zat tihpun a nih takah chuan sum chevel pawh a sang sawt dawn tihna a ni. 2018 World Cup Russia-ah hian television-a pek chhuahna, sponsor leh ticket hralh chhuahna aṭanga ringawtin dollar tluklehdingawn 5.5 hmuh beisei a ni a, kum 2026 World Cup-ah chuan hei hi dollar tluklehdingawn khata pung tura ngaih a ni.

Team pun dan

Kum 1930 khan World Cup hmasa ber khelh niin team 13 an tel a, group liah ṭhen niin group pathumah team pathum zel awmin group pakhatah team pali an awm. Group tina pakhatna ṭheuhin semifinal an lut.

Italy chuan kum 1934 World Cup thlengin team 16 an tel a, knockout-a khelh nghal a ni. Kum 1950 khan World Cup khelh leh chauh a ni a, team 15 tel tura ruahman a ni chungin team 13 chauh tel mah se group erawh ruahmanna pangngai anga kalpui niin team pali zel awmna group pali a awm a, group pakhatah team pathum an awm thung.

Kum 1982 World Cup Spain-a khelh a nihin team 16 tel ṭhin chu team 24-ah tihpun chauh ni mah se 1954, 1958 leh 1974-ah te khan kalphung thlak danglam zel a ni. Kum 1998 France-ah khan team 24 ni ṭhin chu 32-ah tihpun leh a ni a, tun hi World Cup khel thei zat tihpun a nih lehna hmasa ber a ni.



Share this Post

Login to comment
No Comments