Player ṭha rual kawlkhawmtu Barca leh Real

Lionel Messi, Cristiano Ronaldo leh Luis Suarez te chu FIFA Team of the Year thlan chhuah zinga hming langsar fal an ni. Thawhṭanni zan khan Zurich-ah nikum chhunga player ṭha zual hming 11 chhawp chhuah niin Bayern Munich goalkeeper Manuel Neuer tih loh player dang 10 te chu Barcelona leh Real Madrid tana khel vek an ni!

Professional footballer rualten an thlan FIFA Team of the Year zinga lang lo langsar chu Euro 2016 top scorer leh best player ni bawk Antoine Griezmann leh khawvela player man to ber Paul Pogba te an ni. French forward Griezmann hi Best FIFA Award dawng thei tur pathum zinga a telpha nachungin player 11 thlanchhuahah a hming a awm lo.

Kum hmasa lama thlan zingah Thiago Silva, Pogba leh Neymar te tan hmun a awm tawh loh laiin league match 35 a khelh aṭanga goal 40 khungtu Luis Suarez bakah Gerard Pique leh Toni Kroos te hming a lang thar thung. 

La Liga player an intlar ṭhup lai hian Sergio Aguero leh Alexis Sanchez te khelhna Premier League club ten player an thawh miah lo a, hei mai bakah hian football ngaina hnam English player hming a lang miah lo.

La Liga a ropui

Spain rama football inelna sang ber La Liga champion Barcelona hian Messi bakah Dani Alves (Nikum nipuiah Juventus a zawm), Pique, Andres Iniesta leh Luis Suarez te an thawh. Catalan club hian league nomawi bakah Copa del Rey leh Spanish Super Cup te chawi bawkin Champions League semifinal an lut bawk.

Kum 29-a upa Messi hian season hmasa khan inelna hrang hrangah a club tan match 49 a khelh aṭangin goal 41 a khung a, hei mai bakah hian Argentina chu Copa America final a hruai thleng bawk a, final-ah Chile an ngam lo thung. Ram tan nomawi a dawng lo leh Champions League nomawi a chawi lo hi player che ṭha ber thlanna kawnga Ronaldo a tluk loh chhan lian bera ngaih a ni.

FIFA Best Player of the Year chawimawina dawngtu Ronaldo hi FIFA Team a tel turin chuh buai theih a ni lo. Real Madrid forward hian Spanish club hi Europe-a club inelna sang ber Champions League nomawi a chawi pui. Hei mai bakah Ronaldo hian Portugal chu an ram chanchina major title hmasa ber ni turin European Championship-ah a champion pui bawk.

Kum 31-a upa Ronaldo chuan,"World 11 zingah ka thel thei hi ka lawm a, ka tan chuan a hlu a ni. A ṭha thlan chhuah zinga a zawna vawi 10 ka tel thei hi tihpalh thil a ni lo a, hei hian ka thawhrimzia a ti lang chiang hle. He dinhmun ka luah leh theih nana min vote tute zawng zawng chungah lawmthu ka sawi," a ti.

Barcelona thiampuipa Messi leh Real fa chuam Ronaldo te hi a zawna vawi 10 thlan an nihna chiah a ni a, vawi riat thlan tawh Iniesta leh vawi sarih hming lang tawh Ramos te chu thlan chhuah ngun berte zinga mi an ni bawk.

Zinedine Zidane-a naute season liam ta La Liga-a Barcelona aia point khat leka an hniam zawk vangin sawi nep theih an ni chuang lo. Real duhlai zingah Germany international midfielder Kroos, Luka Modric, Sergio Ramos leh Marcelo te hming a lang.

Keeper ṭha Neuer

Kum 30-a upa Neuer hi La Liga player ni lo FIFA Team of the Year a hming lang awmchhun a ni. Bayern Munich keeper hian Bundesliga nomawi a chawi bakah Germany chu Euro 2016-ah semifinal a thlen pui. Season hmasa khan Bayern hian league bikah goal 17 chiah an chhuah a, an hnuai chiaha awm Borussia Dortmund chuan goal 34 an chhuah thung.

German keeper Neuer chuan, "Ka tan chuan chawimawina hlu tak a ni. Club leh ram tana ka khelhpuite vanga hetiang dinhmun thleng thei hi ka ni," tiin a sawi.

FIFA Team of the Year

Goalkeeper Manuel Neuer (Germany, Bayern Munich); Defenders Daniel Alves (Brazil, Barcelona and Juventus), Gerard Pique (Spain, Barcelona), Sergio Ramos (Spain, Real Madrid), Marcelo (Brazil, Real Madrid); Midfielders Luka Modric (Croatia, Real Madrid), Toni Kroos (Germany, Real Madrid), Andres Iniesta (Spain, Barcelona); Forwards Lionel Messi (Argentina, Barcelona), Luis Suarez (Uruguay, Barcelona), Cristiano Ronaldo (Portugal, Real Madrid).



Share this Post

Login to comment
No Comments