EFL Cup semifinal: Saints vs Reds Philippe Coutinho a lo kir dawn?

Zanin dar 1:15-ah Southampton chuan EFL Cup semifinal first leg khel turin Liverpool an mikhual dawn. Nikum final-a Manchester City ngam lotu Jurgen Klopp-a leh a nauten Wembley a an nomawi chan tawh hnu hlawh chhuak turin Southampton hneh ngei an duh dawn.

Saints tan Premier League nomawi beisei chi a ni lo a, Claude Puel-a naute tana beisei tihsan theih berna hmun chu League Cup hi a ni. Southampton-in nomawi chawi chunga season khar an tum a nih chuan an kalkawng dal tum Liverpool an vai kian a ngai dawn - hna hmasa tur chu St. Mary's Stadium a goal chhuah loh a ni. Inkhel hi Ten2-ah en theih a ni ang.

Coutinho a dam

Liverpool fan-te tana chanchin hriat nuam ber tur chu an thiampuipa Philippe Coutinho-a'n dam lam a pan mek hi a ni. Liverpool manager Jurgen Klopp chuan, "Kan tana chanchin lawmawm chu kan player zingah inhliam tharlam an awm lo a, hliam vanga chawl mek kan player-te pawhin ṭhat lam panin training an nei ṭan ve leh tawh a ni," a ti.

Klopp chuan Coutinho chungchang sawilang nghalin, "Phil hi squad a awm turin a dam ṭha tawh a, Thawhṭanni khan training a zawm leh tawh. Fit taka inkhel leh tur chuan training naah hun tam zawk a hman a ngai a, chutihrual chuan game tak tak a khelh a ngai bawk. Phil hi kar sarih zet a chawl tawh a, a khelh dawn leh dawn lohah thutlukna chiang tak erawh siam a la ni lo. Ka sawi theih chu kan ṭhat dan berin kan inrem ang tih hi a ni," tiin a sawi a, Plymouth Argyle nen FA Cup a an in draw ṭuma Reds chanchina starting XI naupang ber chhawrtu hian tihsual nawn a tum lo.

Reds hian Africa Cup of Nations khela thang mek Senegal forward Sadio Mane an chhawr thei dawn lo chiang a, Jordan Henderson leh Joel Matip ten training zawm leh tawh mah se an inlan theih a la beiseiawm loh bawk. Klopp chuan James Milner a dam chian tawh thu a sawi thung.

Final luh duh Klopp

Reds boss Klopp chuan, "League Cup hi England a nomawi ngaihhlut pathumna angin an dah a ni mai thei a, mah se a pawimawh ber zawk erawh chu inelnaah chuan i tel chhung chuan i inhnamhnawihna inelna chu a pawimawh em em a ni tih hi a ni. Mi zawng zawngin final-ah Manchester United nen inhmachhawn se min ti a, mah se chumi tur chuan kalkawng pakhat kan la hmabak a ni," tiin final niloin semifinal a rilru pek phawt a ṭul thu a sawi.

Klopp-a'n Borussia Dortmund leh Liverpool a Cup final a luh hnuhnung pangaah hnehna a chang zo lo vek a, hetichung hian German coach chuan Cup final a hlauh loh thu a sawi. Dortmund boss hlui chuan, "Engtinnge in ngaih? Final hnuhnung pangaah hnehna ka chan zawh loh vang maiin final luh ka hlau ang maw? Teuh lo mai. Two-legged inkhel a nih chuan kan chance neih dan a inbuk tawk hle tih hai rual a ni lo a, mah se duhthlan theih pawh nise khualmuala inlan hmasak hi chu ka thlan tur a ni," a ti a, St. Mary's a lenluh a hlau lo.

Pa tuarchhel Firmino

Krismas lai khan Liverpool striker Roberto Firmino te in chu misualin an rawk a, £70,000 man hu thil hlu an la. Brazilian forward hi hei vang hian hotel-ah a chhungte nen venhimna hnuaiah dah an ni a, khelmualah erawh a buai phah lo - Krismas laia league match thumah inkhel bul a ṭan vek a, Stoke lamah goal a khung bawk.

Klopp chuan Brazil international hi fakin, "Roberto hian hun harsa tak a paltlang mek a, mah se khelmualah erawh a dan pangaiin a khel ṭha em em reng a ni. Khelmuala a awm tawh chuan football chiah a ngaihtuah a, hei hi Roberto chakna thuruk chu a ni," a ti a, Lammuala inkhel tawh forward hian Reds tan inkhel bul a ṭan hmel hle.

Captain tel loin Saints

Tun hnaiah Southampton captain Jose Fonte-a'n club hnenah chhuah dilna lehkha a thehlut a, Saints boss Claude Puel chuan a defender hi Liverpool hmachhawn tur zingah a tel loh thu a sawi. French manager chuan, "Jose hian Liverpool a hmachhawn dawn lo a, a hmabak zel erawh ka sawi thei lo. Inkhel pawimawh takin min hmuak mek a, kan tana pawimawh ber chu kan inkhel tur hi a ni. Chak tura rin zawk kan ni lo tih ka hria a, mah se tlawm thei erawh kan ni lo," tiin Liverpool hneh ngei a tum hle.

Southampton hian Portugal international bakah hian hliam vangin attacking midfielder Soufiane Boufal, striker Charlie Austin leh left back Matty Targett te an chhawr thei dawn lo chiang a, hliam vanga October 2016 hnua a inkhelh tawh loh hnuah right back Cedric Soares chuan inkhel bul a ṭan beisei a ni thung. Saints forward Jay Rodriguez-a'n ngai a awh leh tawh avangin a inlan beisei a ni a, Japanese defender Maya Yoshida chu Fonte hmun ruak luah tura ngaih a ni bawk.



Share this Post

Login to comment
No Comments