Kerber a chak lo nghal

World number 1 Angelique Kerber tan Australian Open champion nomawi humhim a tumna kawng a awlsam dawn lo. German nula hi kumina Grand Slam hmasa ber tur inbuatsaihna tournament Apia International-a a match hmasa berah a chak lo nghal.

Thawhlehni khan kum 28-a upa Kerber hian Russia nula Daria Kasatkina chu darkar khat leh minute 32 chhungin 7-6 (7/5), 6-2 in a hneh lo. Australian Open champion lai Kerber chak loh chhan ber chu a service vawi nga ngawt a hum zawh loh vang a ni a, vawi 41 zet unforced errors a nei.

Kum 19-a upa Kasatkina chuan, "World number 1 ka hneh vanga ka lawmna hi sawifiah mai chi pawh a ni lo. Thil thleng khat tak a nih avangin ka tan chuan a hlu a, hei hian inrintawkna pawh min pek belh ngei ka beisei," tiin a sawi.

Inkhel dangah seeded pathumna Dominika Cibulkova chu Eugenie Bouchard lakah 6-4, 6-3 in a chak lo a, seeded pangana Svetlana Kuznetsova pawhin beisei loh takin 7-5,6-3 in Anastasia Pavlyuchenkova a hneh lo bawk.



Share this Post

Login to comment
No Comments