Dybala a chhuak lo ang - Marotta

Juventus chief executive Giuseppe Marotta chuan a player duhlai Paulo Dybala chu Spanish club lian pahnih Barcelona leh Real Madrid ten lakluh an duh nia sawi ni mah se a chhuah loh tur thu a sawi.

Argentina international Dybala hian tun season Serie A match 11 a khelh aṭangin goal li a khung tawh a, an match hnuhnung bera Bologna 3-0 a an hneh ṭumin penalty aṭangin goal khat a khung. Kum 23-a upa forward hian Turin club tan hian kum 2020 thleng daih contract a nei a, hetichung hian Europe club lian ṭhenkhat ten lakluh an chak hle.

Marotta chuan, "Spanish club nen inbiakna kan nei lo. Dybala hi Juventus tana contract nei lai a ni a, he hmunah hian a hlim. Juve hi khawvela club lian berte zinga mi a nia a, player ṭha tan chhuahsan tur ni loin an pan khawm tur zawk kan ni," tiin a sawi.

Serie A hmahruaitu Juventus hian zanin dar 1:15 hian Coppa Italia round of 16 khel turin Atalanta an lo mikhual ang. Turin club hian thlasik chawlh hnua an match hmasa berah kartawp khan Bologna 3-0 in an hneh a, anmahni khelmualah a zawnin league match 26 chhung zet hnehna an chang.

Zanina an khelh tur hi league match ni lo mah se Juventus hi chak zawk tura rinkai an ni. Inelna hrang hrangah Juve hian Atalanta an hmachhawn hnuhnung 13-ah hnehna an chang fai vek thei a ni.



Share this Post

Login to comment
No Comments