FIFA Best Player Award dawngtu Cristiano Ronaldo

Portugal captain Cristiano Ronaldo chuan Best FIFA Football Awards hmasa ber Zurich-a neihah FIFA Best Player Award a dawng.

Real Madrid forward Ronaldo hian chawimawina dawng tur hian Barcelona forward Lionel Messi leh Atletico Madrid forward Antoine Griezmann te aiin vote a hmu tam a, kum 31-a upa Ronaldo hian December thla khan Ballon d'Or a dawng tawh bawk.

Manchester United forward hlui Ronaldo hian Euro 2016-ah rinkai ni pha lo Portugal a champion pui a, Real Madrid chu club inelna ngaihhlut ber UEFA Champions League-ah a champion pui bawk avangin chawimawina dawn hi a phu a ni.

Chawimawina dang

World's best female player-ah kum 34-a upa Carli Lloyd chu thlan a ni a, United States midfielder hian 2015 khan FIFA Women's World Cup-ah an ram a champion pui a, 2016 Olympic quarterfinal-ah Sweden lakah chak lo mah se nikum chhung khan ram tan ringawt pawh goal 15 tehmeuh a khung. US midfielder Lloyd hi Germany midfielder Melanie Behringer leh Brazil forward Marta ten an pha lo.

Season liam ta Premier League-a mak tak maia Leicester City champion puitu Claudio Ranieri chu best men's coach atan thlan a ni. Portugal champion puitu Fernando Santos leh Champions League-a Real Madrid champion puitu Zinedine Zidane ten Italian manger hi an tluk lo.

Best FIFA Women's Coach atan Germany coach hlui Silvia Neid thlan a ni. Kum 52-a upa Neid hian 2016 Summer Olympics-a Germany gold medal a lakpui zawhah coaching hna hi a chawlhsan a, sulhnu ṭha tak a hnutchhiah bawk. Kum 2005 aṭangin Neid hian Germany hi a enkawl a, Olympic hnuhnung bera gold medal a lakpui hma hian 2008-ah bronze medal a lakpui tawh a, UEFA Women's Championship-ah vawi hnih champion pui tawhin FIFA Women's World Cup-ah a champion pui tawh bawk.

Malaysia club Penang FA midfielder Mohd Faiz Subri chuan Puskas Award a dawng a, he chawimawina hi goal mawi ber khungtu hnena hlan ṭhin a ni. Faiz hian February 16, 2016-a Pulau Pinang an hmachhawn ṭumin freekick danglam bik a khung a, Penang midfielder ball pet chu boruakah nasa taka a kawi hnuah goalkeeper Mohd Nasril Nourdin tan dan rual a ni lo.

Ballon d'Or nen a inang em?

Best FIFA Football Awards hi Ballon d'Or nena hriat pawlh loh tur a ni. France Football-in kum 1956 aṭangin Ballon d'Or hi an buatsaih tawh a, kalhmang erawh thlak ve fo mah se kum tinin neih ziah a ni. 

Khawvela football thuneitu sang ber FIFA-in kum 1991 aṭangin FIFA World Player of the Year an thlang ve thung a, kum 2010-ah FIFA leh France Football thawk dunin mimal chawimawina hming chu FIFA Ballon d'Or-ah thlak a ni. Kum 2015 thleng khan thuneitu pahnih hi an thawk dun a, tunah erawh a hrana kal lehin France Football-in Ballon d'Or an sem chhunzawm a, FIFA-in Best FIFA Football Awards an sem ta thung.

Ronaldo a lawm

FIFA Best Player Award dawngtu Ronaldo chuan, "A vawi khatnaa nomawi ka dawng thei hi ka lawm a ni. Ka chawimawina dawn hi Real Madrid leh ram tana ka khelhpui leh coach-te tan ka hlan. Ka career-a ka thlen san lai ber a ni a, mimal leh team ang  pawhin kum ṭha tak ka hmang a ni," tiin chawimawina a dawn avanga a lawm thu a sawi.

Barcelona-in January 12, Nilaini zan dar 1:45-ah Athletic Bilbao nen Copa del Rey last 16 second leg an khel dawn a, Catalan club hian first leg-ah 1-2 a an hneh tawh loh avangin inkhel pawimawh a ni. Hei vang hian Best FIFA Football Awards-ah Lionel Messi a inlan lo a, Barcelona player dang an inlan lo bawk.

Real Madrid forward Ronaldo chuan, "Messi leh a teammate dangte pawh he hunah hian lo kal ve se tih hi ka duh dan a ni. Amaherawhchu inkhelh tur an nei a, an rawn kal loh chhan hi ka hriatthiam pui em em a ni," tiin Barcelona player an tel ve loh thu a sawi lang.

Ronaldo vs Messi

Best FIFA Football Awards 2016 hi national team captain leh coach, journalist thlan bik bakah mipui vote lak tel a ni. National captain leh coach vote hi 50% lak a ni a, 50% dang hi mipui vote leh journalist te vote aṭanga lak a ni.

Portugal captain Cristiano Ronaldo chuan player pathum a thlan chhuah zingah Messi a dah tel lo a, club tana a khelhpui Gareth Bale, Luka Modric leh Sergio Ramos te a thlang. Argentina captain Messi-a'n a elpui Ronaldo a duhsak bik lo. Barca forward Messi hian Luis Suarez, Neymar leh Andres Iniesta te a thlang chhuak ve bawk a, an vote thlan danah a inel tih phat rual a ni lo.

Award lian thamRonaldoMessi

Ballon d'Or1 (2008)1 (2009)

FIFA Ballon d'Or2 (2013, 2014)4 (2010, 2011, 2012, 2015)

FIFA World Player of the Year1 (2008)1 (2009)

FIFA Best Player Award1 (2016)0

UEFA Best Player in Europe Award2 (2013-14, 2015-16)2 (2010–11, 2014-15)

Total78

Vote hmuh dan

Cristiano Ronaldo34.54% 

Lionel Messi26.42% 

Antoine Greizmann7.53%

FIFA THE BEST 2016 AWARD

Men's PlayerCristiano Ronaldo

Women's Player Carli Lloyd

Men's CoachClaudio Ranieri

Women's CoachSilvia Neid

Fair Play AwardAtletico Nacional

Award for Outstanding CareerFalcao

Puskas AwardMohz Faiz Subri

Fan AwardBorussia Dortmund leh Liverpool supporters

FIFAPro World11Manuel Neuer, Dani Alves, Marcelo, Gerard Pique, Sergio Ramos, Andres Iniesta, Toni Kroos, Luka Modric, Cristiano Ronaldo, Lionel Messi, Luis Suarez



Share this Post

Login to comment
No Comments