Bihar assembly Inthlan leh By-election-a vote tla chhiar

Bihar Legislative Assembly election leh state 11-a by-election neih zawh taka vote tlate chu nimin khan chhiar a ni, result kimchang erawh hriat hman a ni lo. 

Bihar assembly inthlan hi thawh thuma neih niin, October 28, November 3 leh 7 te khan vote thlak a ni. Seat 243 awmna, assem­bly-ah hian sorkarna siam tur chuan seat 122 hmuh phak a ngai a ni. 

Hemi rual hian state 11-ah by-election neih a ni bawk a, by-election neihna state-te chu - Chhatisgarh (seat 1), Gujarat (8), Haryana (1), Jharkhand (2), Karnataka (2), Madhya Pradesh (28), Manipur (5), Nagaland (2), Odisha (2), Telangana (1) leh Uttar Pradesh (7) te an ni. 

Result hriat theih tawh chinah Bihar-ah hian rorellai, Janata Dal (United) hruaitu Nitish Kumar kaihhruai Natio­nal Democratic Alliance (NDA) chuan hma an hruai a; eptu ṭangrual pawl, Rash­tirya Janata Dal (RJD) kaihhruai Mahagathbandhan nena an inthlauhna erawh a la tlem hle. By-election neihnaah pawh BJP in seat tam zawk an lak rin a ni bawk.