US Air Force hotuah a vawi-khatna atan mi hang rua
US Senate member-te chuan a vawikhatna atan US Air Force chief of staff atana mi hang, General Charles Brown Jr dah rawtna chu lungrual takin an pawm.
Vice president Mike Pence chuan US Senate-in vote an thlakna hi a kaihruai a, Brown hian vote 98 hmuin US Air Force chief of staff atan dah duh lotu an awm lo. Charles Brown Jr hian American history a siam a ni, a ti.
May 25 khan mi hang, George Floyd chu US police officer kut tuarin a thi a, kha thihna avang khan mi tam takin US-ah chi inthliarna duhlohna lantirin hmun hrang hrangah nawrh an huaihawt a ni. He thil thlengin a nghawng zelah, US Air Force hotu atan mi hang dah duhna hi a lian chho phah ta niin media ṭhenkhatte chuan an tarlang.
Tu nge General Charles Brown Jr?
Kum 58 mi General Charles Brown Jr hi March 2 khan US president Donald Trump chuan US Air Force chief of staff atan a lo rawt tawh a, June 9 khan US Senate chuan vote lain an duh vek bawk a ni. Brown hi Pacific Air Forces-a commander nilai mek a ni.
Kar liam ta Zirtawpni khan Brown hian US sipaia a ṭan tirh aṭanga chi inthliarna a tawh chungchang sawi chhuahna video a tichhuak a, hei vang hian a lar phah hle. US Air Force chief of staff atan Brown hi US Senate-in hneh taka an thlantlin avang hian Trump chuan a twitter-ah lawmpuina thu a sawi hial.
US Air Force chief of staff nilai mek hi mingo General David L. Goldfein a ni a, ani hi kum 2016 July thla aṭang khan he hna hi a chelh ṭan a ni. Chief of staff hun chhung hi kum 4 a ni a, kumin hi a thar ruat hun chiah a ni. US chanchinah Chief of staff atan hian mi hang vawikhatmah ruat a la ni ngai lo.