Brazil-in Coronavirus data kimchang dah lang leh

Brazil sorkarin official website-a coro­navirus data kim­chang a dah lan duh tawh loh avanga sawiselna tam tak a awm hnuah, Supreme Court thupek angin Thawhlehni aṭang khan a dah lang leh. 

Official website-ah hian darkar 24 liam ta chhung hri kai thar leh hemi hun chhunga hri vanga thi zat chiah tarlan a ni tawh a, hri kai chhuah tawh zat leh thihpui tawh zat tarlan tel a ni tawh lo a ni. 

Mahse Thawhlehni zan aṭang khan data kimchang hi dah lan leh a ni a, data-a a landanin darkar 24 liam ta chhung hri kai thar chu 32,091 awmin, thihpui 1,272 an awm bawk. An rama hri kai hmuh chhuah tawh hi mi 7,39,503 an ni tawh a, an zinga mi 38,406-in an thihpui tawh a ni. Brazil hi khawvela Covid-19 vanga thi tam lamah pathumna a ni tawh a, US leh UK hnuaiah a awm. 

Covid-19 leng dona kawnga hma­lak danah President Jair Bolsonaro chuan sawisel a hlawh hle. President hian  hri leng hi a ngai pawmawh tawk lo a, 'flu tenau' tia sawiin state governor-ten hri darh tur venna atana lockdown an puante pawh sawiselin, thlahdul turin a nawr reng a ni. 

Bolsonaro chuan World Health Organisation (WHO) chu khawvela hri leng mek a buaipui danah a rintlak tawk lo nia a ngaih thu sawiin, WHO chu an chhuahsan mai theih thu pawh a sawi tawh bawk.