Zlatan-a'n Covid-19 dona kawngah hma la

Zlatan Ibrahimovic chuan a footballer puite leh infiammi dangte coronavirus dona kawnga sum thawhkhawm turin a sawm a, Milan striker hian €100,000 (£91,000) thawh nghalin euro maktaduai khat khawn khawm tumin hm a la.

Swedish striker hian a pawisa khawn aṭanga sum tling khawm hi Italy-a damdawi in leh a hnathawkte puih nan a hmang ang. Kum 38 mi Ibrahimovic chuan, "Italy hian thil tam tak min pe a, hetiang hun khirhkhan takah ka khawpui hmangaih hi thil ṭha tihsak ve ka duh a ni," tiin a sawi.

Video kaltlanga a thuchhuah siamah hian Ibrahimovic chuan, "Ka inkhelhpuite inpeknaah ka innghat a, professional athletes leh a tute pawh tlem lua awm loa pe turin ka sawm a che u. Coronavirus hi kan hneh thei a, kan thawhhona hmang hian an nunna thapa damdawi ina thawk doctor leh nurse-te nun kan chhan thei ang. Tun hunah hian anmahni thlawp hi kan tih theih chu a ni," tiin a sawm. Pawisa tling khawm hi Milan, Bergamo, Castellanza leh Torino damdawi ina casualty leh ICU-ah te pek tur a ni. Ibrahimovic hi pa danglam tak a ni a, ṭawngkam maksak tak tak hmangin lawm a hlawh ṭhin hle. Tun ṭumah pawh a tih dan ṭhin pangngaiin, "Virus hian Zlatan a pan lo a nih chuan Zlatan hian virus hi a pan ang," tiin a titawp.

Zlatan Ibrahimovic hi October 3, 1981 khan Malmo, Sweden-ah a piang a. A seilenna club Malmo FF aṭanga bul ṭanin kum 2011 khan Ajax a zawm a, Dutch club tana khelh lai hian Eredivisie nomawi vawi hnih chawiin khawvel huapin a lar ṭan. Ibrahimovic hian Italy panin Juventus tan a khel a, Serie A nomawi vawi hnih chawi mah se a hnuah Turin club hi inthamna chungchang thiam loh an chan avangin an nomawi hi an chhuhsak. 

Inter Milan-ah kalin Serie A nomawi vawi thum a chawi a, Barcelona-ah kalin La Liga nomawi a chawi a, Milan-ah kalin Serie A nomawi chawi lehin Paris Saint-Germain zawmin Ligue 1 nomawi vawi li a chawi. Swedish striker hi a kalna apiangah league nomawi a chawi zelah Manchester United a zawm hnuah erawh Premier League nomawi chawipui thei lo mah se Europa League-ah a champion pui tho. Hemi hnu hian Ibrahimovic hi MLS lamah kalin LA Galaxy tan match 56-ah goal 52 a khung thei a, January thla khan a khelh tawhna AC Milan-ah zawmin coronavirus vanga buai hian hian inelna hrang hrangah goal li a khungsak tawh a ni.