Nagorno-Karabakh indona tihtawpna turin inremna ziak

Nagorno-Karabakh inchuha kar ruk chhung vel Armenia leh Azerbaijan sipaite inbeihna thleng tihtawp a nih theihna turin Armenia, Azerbaijan leh Russia chuan nimin khan inremna an ziak. 

Ram pahnihte indona avang hian mi 1,000 chuangin nunna an chan tawh a ni. 

Russia President Vladimir Putin hoa online meeting an neih zawh hnua TV-a thu a sawinaah, Azerbaijan president Ilham Aliyev chuan ram pathumten inremna an  ziak hi hman nghal tur a nih thu a sawi. 

Inremna an ziah hma lawk hian Nagorno-Karabakh biala khawpui lian  ber pahnihna, Shusha chu Azerbaijan sipaite'n an lak thu Armenian official-te chuan a puang a ni. Nagorno-Karabakh hi khawvelin Azerbaijan ram chinah pawm mah se, a mi cheng tam zawk hi Armenian an ni a, Armenia lam hian an awp thung a ni. 

Armenia prime minister Nikol Pashinyan chuan inremna an siam chu tun dinhmuna an buaina chinfelna tur ṭha ber a ni rih tih a sawi a, he thutlukna siam hi  amah ngei pawhin harsa a ti hle tih a sawi. He inremna siam hi hnehna channa emaw, tlawm ta tihna emaw a ni lo tih sawiin, an ram chu a tlawm zawkah an inngai ngai dawn lo tih a sawi. Hetih lai hian Azerbaijan President Aliyev chuan an ram sipaiten hnehna an chan chhoh zel avangin Armenia tan pawh inremna hi siam loh theih loh a ni tih sawiin, inremna an siam thei ta chu thil chhinchhiah tlak tak a nih thu a sawi. 

Russia defence ministry chuan Nagorno-Karabakh bialah hian sipai 1,960 a dah ṭan nghal dawn tih sawiin, kum nga chhung awmtir an ni ang, a ti. Putin chuan Russia sipaite hian Armenia leh Nagorno-Karabakh inkarah dah an nih tur thu a sawi. Anni bakah hian Turkey pawhin sipai dah a tum bawk tih Aliyev chuan a sawi.