Hun harsa ber a ni - Sane

Manchester City winger Leroy Sane chuan season chanve aia rei a khelh theih lohna chhan a hliam neih chu a hun tawna hrehawm leh rei a tih ber a nih thu a sawi. Germany international hian training ṭha taka neiin a inkhel thei ve leh ṭan tawh a ni.

Nikum August thla khan Man City leh Liverpool ten Community Shield an inchuh a, he inkhelah hian Sane hi a khup a hliam. Premier League season chawhma lam zawng chu a inkhel thei lo, tunah pawh senior team tana khel tur chuan a la inpeih tawk chuang lo.

Kum 24 mi Sane chuan, "Ka hun tawn tawhah chuan hliam vanga ka chawlh rei ber ṭum a ni, a hrehawm takzet bawk. A bik takin min zai tuk kha, mahni in ka che sawn thei lo, infiammi nih chuan hetiang baka tawrh har hi a awm thei chuang lo.

"Chutih rualin hun harsa nia kan ngaihte pawh hi malsawmna a ni ve thei tho, mahni chak lohna leh ṭhat tawk lohna laite inzir chhuahna hun a ni thei. Kei ngei pawh mahni infuih phur reng chungin nitin mahni awm hmunah theihtawp ka chhuah reng a ni," a ti.

German international Sane hian January thla aṭang khan training a zawm ṭan leh tawh a, Man City under 23 team tan chuan hun rei vak lo chhung a khel thei tawh. Coronavirus vangin EPL an chawl mek a, tluang taka an khel leh thei a nih chuan tun season chhungin Sane kan hmuh leh hman a beisei awm.

Sane chuan sawi zawmin, "Team pumpuiin min thlawp ṭha em em a, puih ka ngaihna leh ka mamawh chu min tihsak ṭhin. A bik takin Benjamin Mendy leh Ilkay Gundogan ten min pui ṭha zual, an lakah lawmthu ka sawi tak meuh meuh," tiin harsatna a tawh laia a ṭhian ṭhate a sawi.

Kum 2016 khan Sane hian Schalke aṭangin Man City hi a zawm. English club tan hian inelna hrang hrangah match 191 khelin goal 52 a khung tawh. Premier League nomawi pahnih bakah FA Cup vawi khat a chawi tawh bawk.Hun harsa ber a ni - Sane