Donald Trump-a'n US defence secretary ban
US president kal chhuak tur Donald Trump chuan Thawhṭanni khan defence secretary Mark Esper chu a ban a, a aiah National Counterterrorism Center-a director Christopher C. Miller chu ruat a nih dawn thu a sawi.
Christopher C. Miller hi acting defence secretary a nih dawn thu Trump chuan a sawi a, kalchhuak ta Mark Esper chu a hnathawh chhung zawnga ṭha taka a thawh vangin a chungah lawmthu a sawi bawk.
Esper leh Trump inkar boruak chhiat chhohna chhan ber hi Afghanistan-a US sipai lakchhuah chungchangah a ni a, Trump chuan US sipaite chu lakchhuah vek a duh tawh hle niin media-te chuan an tarlang. Hemi kawngah hian Esper chu hnathawk muang a tih vangin Trump hian a ban zui ta nia sawi a ni. Kum 56 mi Esper hian nikum July thla aṭang khan US defence secretary hna hi a chelh ṭan a ni.
November 3-a US President thar thlanna neih a nih hma lawk, October 26 khan secretary of state Mike Pompeo leh Mark Esper-te hi India ramah 2+2 Ministerial Dialogue neiin an zin a, he inbiaknaah hian ram pahnihte thawhdunna tur inremna pawimawh tak tak an lo ziak a ni.