Germany national team-in Covid-19 do nan euro maktaduai 2.5 hmang

Germany national team chuan coronavirus dona kawnga hmalak nan euro maktaduai 2.5 an hman tur thu an puang. DFB team hian, "Kan chetzia hote pawh hi a ṭangkai," tih thupui an hmang a, ṭanpui ngaite puiin an luang chhuak.

Germany team-a tel Manuel Neuer, Leon Goretzka, Luca Waldschmidt, Joshua Kimmich leh player ṭhahnem takin instagram kaltlangin mipui an fuih. Captain Neuer chuan, "Ram pum angin kan thawh hona a ṭha a, tute pawh kan inpui tlang hi a lawmawm hle. Damdawi in te, tar enkawl nate, dawr lian te leh damdawi dawr te kan thlir chuan ka thusawi dikna hi kan hmu ang. A ropui ka ti," tiin German mipui a fak.

Bayern Munich midfielder Leon Goretzka pawhin, "In enkawl uluk ula, inah tawm tlat ru. Kan dam ang a, football khelmualah kan inhmuh leh ngei ka beisei tlat a ni," tiin Covid-19 darh zel loh nan ina tawm a pawimawh thu a sawi.

Europe khawpuiah Germany hi a tuar na zinga mi an ni a, World Health Organization-in a tarlan danin Nilaini thleng kha chuan mi 7,000-in kai tawhin mi 13 an thi.