Nipuiah Silva a chhuak dawn

Thiago Silva chuan season riat a chamchih tawh Paris Saint-Germain chu tun nipui bazar inhawn hunah a chhuahsan dawn. Brazilian defender chhuah tur thu hi French chanchinbu mite chuan an tarlang a ni.

Kum 35 mi Silva hian tun season kal lai tawp thleng bak chu Paris club tan hian contract a nei tawh lo. Hun rei zawk cham turin sawmna a hmu lo a, zalen takin mahni duh lam hawi theia siam a nih hmel.

PSG tan Silva-a'n Ligue 1 nomawi chauh pawh vawi sarih a chawi hman a, French Cup pali leh League Cup-ah pawh vawi nga a champion hman - sulhnu ṭha tak hnutchhiah chungin a chhuahsan ang.

Italian club AC Milan nen sawi zawm a ni a, tun hma lama a khelh tawhna San Siro-a kir tur ang pawhin an sawi hman. Mahse, tun hnaiah an khaw club Fluminense jersey a keng lai hmuh a ni a, jersey hnungah hian a hming a inziah avangin an ram lamah a kir zawk ngei a rinawm.