Federer leh Toni ngaihdan a inang lo

Tennis season chu coronavirus vangin chawlh lailawk a ni a, thuneitu sang lam chuan entu awm loa kalpui an tum. International Tennis Federation kalphung siam hi Toni Nadal chuan a thlawp, player ropui Roger Federer erawhin a thlawp lem lo thung.

March thlatir aṭang khan tennis hi an khel tawh rih lo, tuna an beisei dan chuan July thla tawpah chuan a hmuna entu awm loin khelh leh theih an beisei - US Open leh French Open pawh khelh an la tum ruh hle.

Grand Slam vawi 20 champion tawh Federer chuan entu awm loa inkhelh chu a holam dawn hlein a hriat thu leh, tennis hlutna a tlak hniam tur thu a sawi; world number 2 Rafael Nadal pawhin tun dinhmunah chuan inkhelh châkna a la neih loh thu a sawi ve bawk.

Mahse, hun rei tak chhung Nadal lo enkawl tawhtu coach Toni ngaihdan erawh a danglam. Spanish manager chuan, "Player lam ngaihdan hi ka hriatthiam pui, a bik takin Roger Federer-a'n a ngaihdan tlang taka a sawi kha a ṭha ka ti bawk.

"Amaherawhchu thil hi ngun taka ngaihtuah a ngai, a tawp khawkah chuan kan duh leh ngainat zawng ai chuang eng nge tih theih tih hi kan ngaihtuah a ngai fo ṭhin. Fans awm lo chuan a nuam dawn lo, pawisa pawh a tlem bawk ngei ang, mahse inkhelh loh ai chuan entu nei loa khelh chu a la ṭha zawk," a ti.

Thla hnih chuang inkhel thei loin awm mah se tennis world ranking erawh a pangngai reng a, an inkhelh leh theih hunah hri leng vanga an chawlh hma lama a ranking ngai kha an ring leh thei dawn.