First Class Cricket leh Zofate (Part 2)

Mizoram cricket-in ram pawn a thleng ve ta a, India rama cricketer ṭhate leh Mizote an inhmachhawn ta hial. Hemi chungchang hi First Class Cricket leh Zofate Part 1-ah thailan a ni tawh a, tun ṭumah hian kua kan reh thuk zel dan kan ziah chhunzawm ang.

Season liam ta (2018/19) lamah khan khelmual zawlah chhuan tur tam tham hnutchhiah lo mah ila, Mizoram cricket chuan nasa takin hma a sawn phah tih a chiang reng. Mizoram cricket chu nung sawtin inelna boruak leh khelh dan hmang hrim hrim pawh a zuanin a zuang dawrh tih hai rual a ni lo. 

Chutah 2019 Thiṭin thla kan thlen chuan kum hmasa lama kan tawnhriatte aṭanga inzirin, talent neih ang ang te tah hriam a ngaihzia kan hria. Association lam hruaitute chuan inpuahchahna hmunhma nei ṭhat tawk loh vang leh fur ruahtui hawng vanglai lo ni bawk nen, thla hnih zet chu India rama cricket zirna leh hmuhma ṭha ber zinga mi Dehradun leh Visakhapatnam khawpuiah min han inkulhtir ta.

Indoor, outdoor, gym, ei leh in ṭha leh professional cricketer-tena an mamawh chi tin reng awmna, India leh foreign player thlenga an lo inkulh ṭhinna hmunah chuan tual kan chai  ve ta ran mai le. Graduate hlim awrhin, thla hnih chhunga IAS exam hmachhawn tura inbuatsaih dinhmun ang deuh chang mah ila, hma erawh kan sawn narawh e.

Kum liam ta lama min sawp hreptu, player ṭha hlang awmna Uttarakhand team-te nen friendly match kan khel zeuh zeuh a, hneh chiah lo mah ila, kan tawh a khirh ṭanzia chu a ni tela hmu tute an ni.

Vijay Hazare Trophy ṭum hnihna kan han hmachhawn ve leh meuh chuan, kan ngam loh ṭhin Arunachal pasalṭha te hnehsawh takin kan tlawm der a. Khuain min bumro vanga inkhelh theih loh ni awm mah se India hmar chhaka vawk lal len Assam kan tum a, India A leh IPL thlenga lo inlan tawh Assam thiampuipa Arup Das a ball vawm, Dawrpui tlangval Lalhmangaiha'n an hlap tak tak hnu a, an player-te chi ai leh hrilhai lutuk hmel te kha a rah chhuah ṭhenkhat zinga lo lang chu a ni ṭan ta.

Ranji Trophy ṭum hnihna kan hmachhawn leh meuh chuan, BCCI lam duhsakna a zarah, Sihhmui Khelmual lam cheiṭhat lai a lo ni bawk nen, kan ipte pui ban nan Kolkata khawpui ngei mai pek kan ni zui a. Ngam loh ena kan en ṭhin Manipur lakah keimahni chetsual vang liau liaua kan vanduai ta zawk te kha hmasawnna rahbi thar a tih loh theih lo ang.

Spin khel thiam larna India ramah Chaltlang tlangval ball vawmvir thiam Bobby Pachuau-in ball chhia pakhat pawh a vawm tih tur awm lo khawpa wicket nga an la ṭhawt mai te kha chhinchhiah a va harsa lo em. 

A ziaktupa hi a hmu chiang ber zinga mi ka ni ve a, a vuak leh vawm lama thawh hlawk ta lo chu a ball chan lamah ṭan kan la a, he column hming put chhan Silly Point aṭanga vawi thum lai lo dawnsaktu ka ni. Hemi ni hian Lal Isua leh Petera te iangin Bobby a hi tui chungah a kal thei pawh ti se, ka awih hial ang.

A vawm lamah kan che ṭha a, a vuak lamah pawh rahbi thar kan chuangkai. Kum hmasa lama dawl zawra kan zawrna khelmualah Arunachal Pradesh kan hmachhawn a, Lalhruaizela'n run 124 a siam. Durtlang rawlthar Hruaizela hian hmabak êng tak a nei a, Zofate zinga first class cricket-a century siam hmasa ber a ni a, lawm avangin dressing room pawh a nghing dur dur a ni ber.

North East team ṭha Nagaland-in inthuamchhah nan India tana inlan tawh Stuart Binny an kawl a, Mizoram lakah an buk a rit hle. Nagaland nen pawh hian Mizoram hi chak lo zawk tura ngaih kan ni a, inkhelh hnuah erawh ruah vanga inkhelh zawh theih loh a nih avangin kan vanduai ta thung. Phai lam chanchinbuah 'Mizoram an vanduai a, Nagaland an vannei' tih an chuang kiau mai hmuhte khan, nomawi chawi kher hi hmasawnna rahbi tehna a ni lo tichiangtu a lo ni.

Kumin Pawlkut thla khan Bhubaneshwar khawpuiah Sikkim kan han hneh a, Mizoram cricket chanchinah bung pawimawh ber zinga mi kan inziak kai leh ta. Team chakpui tura Zotlang tlangval C. Lalrinsanga'n ball thar laia darkar hnih chuang an chai te, Luangmual fast bowler G. Lalbiakvela'n innings khata batsman pariat ngawt a vawm hlum hnua, inkhel pumpuia, wicket 11 an la mai te kha, India tana khelphak tam tak pawhin an la tih ngai meuh loh a ni.

Hemi ṭuma Biakvela ball vawm Star Sports in an live lo hi, Aishawarya Rai-i'n khiang min awihsan ṭum zeta ka ui ai pawhin ka ui awm e. Biakvela khawsak dan khan, Sikkim player-te hi tun hnu thleng hian zan mutmu tuah har tih chang a pek zui hi ka ring tlat ṭhin. Aizawl West tlangvalte an che ṭha thlawt.

Puducherry nen kan intum ṭumin Lalhmingmawia'n Vinay Kumar ball vawm a zawna vawi thum zet mai four an hlapsak a, hmuh a nuamin a va ropui kher em. Vinay Kumar hi IPL star leh Indian cricket a batsman vawm hlum hnem ber record chelhtu a ni a, chak zo ta lo mah ila Hmingmawia hnathawh hi sawi nep theih a ni lo.

Vinay Kumar hian sponsor pheikhawk present atan pek a tum a, an bun tawk a inan loh avangin kutkawr changkang zet hriatreng nan a hlan te kha kan hmasawnna ti lang chiangtu zinga mi ka ti lo thei lo. Mizoram a awm ve tih hre loten, min lo hmelhriat ṭan der tawh ti lang chiangtu a ni.

Heti lai mek hian, kan naute age group leh hmeichhe lam hmun hrang hranga feh chhuak lahin chanchin lawmawm an rawn hawn ve zel bawk. Under 16 inelna lamah hnehna an chan piah lamah Ramhlun Venglai naupang hmabak êng tak Vanrotlinga century siam thu te, hmeichhe lamah Chalrang nula PC Vansangzuali'n half century a vuak chhuah bakah team an chak thute an rawn ri ta chuai chuai mai bawk.

Nau ang maia kan lo kaihhruai Hruaizela chu Ranji Trophy-a centurion kan neih hmasak ber a ni a, ani nen hian team bus a thu dun ṭhin kan ni. Lawmpuitu message leh phone a dawn chum chum lai chuan, "Ka nau, keini infiammi hi chu dinhmun sang taka awm a, a tuka khu ta tla leh thei kan ni. 

Vawiin i hlawhtlinna hi rahbi pakhat a bul ṭan ve chauh i ni tih theihngilh loin, vawiina 'hosana' titute hi, naktuka khengbet rawh titute an ni thei. Inngaihtlawmna, midang zah thiam, ṭan leh zual sauh bakah he dinhmun pe tu che Pathian leh cricket game zahna hi thlahthlam ngai suh ang che," tiin thiam ang tawkin kan fuih a.

Ka thiam ang tawka senior dinhmun aṭanga kan fuih ve te - Under 16 lama record siamtu Vanrotlinga phone hmanga lawmpuina thawn paha kan fuih ve te kha, a fuih tlak lo ber zinga mi ka ni tih inhre reng chungin, kan inkhelh ṭantirha kan rual u te leh senior tena min lo fuih leh zilh ṭhinna ka hlanchhawng ve mai a ni.

Khelmual pawn lamah BCCI insiksawi avangin State Association hruaitu inthlan a ngai a, hruaitu tharte pawh rawlthar kan nih laia Mizoram team leh club lama min kaihruaitu, cricket chhungkua a mi ngei an ni tih phai lam aṭangin kan han hria a.

President atana thlan Robert Lalfamkima leh general secretary atana thlan Mamon Mazumdar te hi mahni sum leh tha seng a, Mizo cricket hmasawnna nana beitute an ni a. An thawhpuite hming lam vek seng lo mah ila, an kaihhruaina hnuaiah Zoram cricket ngainatuten beiseina sang tak kan nei.

India ram infiamna ngaihsan rawn cricket meuha professional ni tura inzirtur ngahzia hrechiang tute zinga tel vea ka lo inchhal a nih pawhin, tu pawi mah kan sawi lo turah ngai ila. 

A thla tel mahni inlum kalsana, sik leh sa inthlak tawn zak zak, ram leilung leh boruak inang lo tak takna hmunah lu nghahna nghet pawh nei mang loa khawsak a lo ngaih chinah chuan, chhel leh paukhauh a lo ngai khawp mai.

Nupuite fa neih laia awm hman lote, chhungkaw chhiat tawh laia mittui tla chunga inkhelh ngai si te, fate birthday hmasa ber tel ve hman lote, kum hlui thlah zana a tuk kumthar ni inkhel awm avanga mut hmak ngaih chang te a awm. Chutiang hunah chuan kan inkhelhpui kan ṭhiante hi kan chhungkua ngei an lo ni a, lawm leh lungngaih avanga mittui tlak changa kan innghahna te an lo ni ṭhin.

Team khata mipa rual 20 vel, chawrchhuahna leh hmelhmang pianzia, kum leh duh zawng inang lo ve tak tak khawsa ho ta chu chanchin sawi tur lah kan ngah. Ziah sen lah ni hek suh. Ṭhenkhatin an fanute high sikul exam tur phone-a an fuih mek lai a, i fanu phone number chu min lo pe ve tia lo hlim tawk vel lah bang lo te kan han ni ta nuk mai ṭhin. 

Changchhiat chang leh thu inhmuh loh chang te awm ve ṭhin mah se, team lo phuar nghet zeltu zawk niin, chumi rah chu khelmual chhungah kan hmu ta zel mai chu a nih hi maw.

Fitness leh training lam department hoin luak dawn khawp khawpa kan fit loh hlaua min sawizawi te, ei leh in insum tura min kaihruaina te kha kan ṭhatna tur vek a ni a. Taksa chau leh rawl tihdam nana minute thum tehmeuh vur tlanga min han chiah 

ṭhin te kha, ngaia neih a va har tehreng em.

Aw le, tun dinhmunah chuan, IPL-a khelh te, India team-a Mizo hming hmuh chu sawi loh, Ranji Trophy champion tih te chu beisei chi ziazang a ni lo. Zep thu a cheng lo, chutiang dinhmun thleng tur chuan nipui engmaw zat hi a liam leh phawt a ngai ang. 

Mahse, BCCI hnuaia inziahluh aṭanga kum hnih leka upa Mizoram Cricket hi kum khatnaah mawngphah leh ti kimtu ang lek ni mah ila kum hnihna a lo pumhlum meuh chuan, group-a team 10 zinga pariatna kan lo ni ve ta der mai. Keini aia inkhel hmasa leh changtlung zawk state pahnih chu kan lehpel ti ila, dawt kan sawi awm lo e.

"Ti nge in va chak khat ve?" tia min lo zawttu lah kan tawng fo. "Tun dinhmunah chuan High School Sport-a Primary School naupang lo va tel ve ang hi kan la ni hrih a, mahse lo ngai reng ru, kar loah High School kan rap ve thuai ang," tia tehkhin thua chhan mai hian a sawifiah berin ka hre ṭhin.

Kum hmasa lamah IPL bowler chhuanvawr ten 140 kmph vela kawh ball kan hmachhawn a, ball vuak hman chu sawi loh, hmuh pawh hmu mang lo a, 'Huiss' tia, damkhawchhuah dan va zawng chawp ṭhin valrual ho kha, tunah chuan kan hlap thlawk ve ta zak zak mai le. Engkim hian hun a mamawh a, a hun bi duh rei zawng erawh a hmachhawn tute kutah thui tak a innghat mai a lo ni.

India rama cricket tui tawh zawng zawngin an thlen châk, phai ram khawpui lian ber bera naupang kum sarih mi vel aṭanga bat hum dan zir ṭan, a za tel rual academy tinah khuan an phe suau suau a. 

Khaw khatah hian academy 20 chuang zuk awm a. A hlawhtling leh vannei hi chu chhiar tham lek an nih lai a, cricket association leh BCCI hmalakna kaltlanga kan kawtkaia 'national level cricket khelhna awlsam' a rawn inhung ta mai hi pheicham man ang tlukah ka inngai hial ṭhin.

Khatia Jorhat khelmuala Ranji Trophy kan khelh lai mek khan dressing room bathlar aṭangin Mizoram aiawha bat pahnih kan thlir a. Batsman pahnih chu team chhanhim turin an infuih sauh sauh a, pakhat zawk hi kum 20 mi Hruaizela leh a pian hmaa Mizoram tana lo feh chhuak tawh veteran leh captain Zorinliana te an ni. Ball kawh leh harsa tak tak an hmachhawn lai mek chuan kei lah pek chuan thildang daih ka lo hmu a. Mihlim chu ni ila, ṭawnghriatloha thailan hial ka nuam: Mizoram Cricket leh Zofate infiamna atana beiseina meichher nung inhlanchhawng min lo kawhhmuh reng a ni.

Hetia mitthla leh sulhnu hlui chhui kir paha he thuziak ka buatsaih lai mek hian, ka phone message ri chu kan bih dek dek a, rawlthar rual hoin tlai lama practice pui tura min sawmna chu a lo ni a. Ekhai, tun ṭum atan chuan a ziak lam duhtawkin, khelmual lama hmabak awm thlir chunga thu tisaa chantir a lo hun leh ta reng mai.

Hei erawh a tawp nan ka thailang hram duh: Cricket khawvelah hian Zofate tan hmabak a êng chiang e.