ISL: Kolkata derby boruak a sang dawn

Sum tam tak senga Indian Super League kalpui a nih chhung zawnga a ropui tawk lohna chhan anga an sawi chu Kolkata club lian Mohun Bagan leh East Bengal ten inelna an hmachhawn ve tlat loh vang a ni. 

Tun season-ah erawh Mohun Bagan-in ATK nena inzawmin ATK Mohun Bagan tih hming an pu a, Bagan rawng green and maroon an chhawm zui bawk avangin ATK tia koh aiin 'Bagan' tia koh an hlawh ta zawk. 

Bagan-in ISL an khelh dawn avangin East Bengal-in awm mai mai an tum bik lo. West Bengal chief minister Mamata Banerjee-i'n Red and Golds-in fans an ngahzia a hai lo a, a pui nghal vat - Shree Cement an lo lang a, East Bengal-ah share an lei zui. 

ISL-ah East Bengal an inhlangkai zui a, zanin dar 7:30-ah an match hmasa ber chu an hmelma kumhlun Mohun Bagan nen an khel dawn - club pahnih vangin ISL-in ngaihven a hlawh lehzual a, zanin inkhel a 'hot' loh ring suh. 

Mizo tlangval Jeje Lalpekhlua'n ram leh club tan India ram chhunga nomawi chawi theih ang chu a chawi kim a, mimal lawmman ni se, "Ka la dawng ve lo," tia sawi tur a nei meuh lo. 

Heti taka hlawhtling striker hian nomawi a chawi tawha a ngaihhlut ber chu Mohun Bagan tana 2014-15 season-a I League nomawi a chawi kha a ni a, Hnahthial tlangval hian, "Kha nomawi kan chawi kha chu thil dang nen khaikhin chi a ni lo.

"A ropui hi a ni tawp mai. Kolkata khawpuiah fans an pungkhawm a, lawm avanga patling bianga mittui luangte kha a mak zawk a ni," tiin Vanglaini hnenah a lo sawi tawh a, hei ringawt hian Bagan fan-ten club an hmangaihzia a hrilhfiah - zaninah erawh Jeje-a'n East Bengal jersey a ha dawn. 

East Bengal fans an danglam lo. An tan chuan red and golds chu rawng a ni satliah lo a, an nuna bet tel tlat a ni. ISL-a an match hmasa bera Bagan an hneh nghal a nih phawt chuan an lawmnain van a tawng hial ang. 

Khawvel huapa derby ropui an sawi meuh pawhin Kolkata derby sawi lan a ni ṭhin a, club lian pahnih inkhel hian khawvel hriatah chanchin ngaihnawm leh rapthlak tak thlengin a lo chhawp chhuak tawh ṭhin. 

August 16, 1980 khan Eden Gardens-ah club pahnih an inkhel a, second half-ah referee-in first half aṭanga boruak nei tawh pahnih, East Bengal right back Dilip Palit leh Mohun Bagan winger Bidesh Bose-te a hnawt chhuak. 

Referee thutluknain boruak a ti alh a, fans indaidanna bang derdep tak chu tihchhiatin a awm a, mi 16 ngawtin nunna an chan phah. Bengali chanchinbu lar Anandabazar Patrika chuan, "Kolkata damdawi in ṭhenkhat kawt chu mittui leh ṭap thawmin a khat a ni. 

"Ṭhenkhatin mangang takin an fate an zawng a, khawi damdawi in berah nge an nupui pasal/fanau inhliam an awm hre loin damdawi in hrang hrangah an tlan kual a ni," tiin a tuk chhuak chanchinbuah an ziak a, hei hian Kolkata derby boruak chu chiang takin a hrilhfiah. 

Kum 1975 khan Kolkata derby-ah East Bengal-in 5-0 ngawtin Mohun Bagan an sawp a, Bagan tan chuan mualpho thlak tak a ni. Bagan fans zingah Umakanto Palodhi chuan a tuar thiam lo fal a, a nunna a lak phah hial. 

Palodhi hian, "Ka pian nawn lehnaah chuan Mohun Bagan footballer ka ni ang a, phuba ka la dawn a ni," tiin a lehkha hnuhnungah a ziak a, a tan chuan Bagan chak lohna chu tuar dam theih a ni lo. 

Federation Cup 1997 semifinal tak te kha aw - khelmual hmingthang Salt Lake Stadium-ah fans 1,31,000 tehmeuh an pungkhawm tehreng a nih kha. 

Covid-19 hri leng lo se, zanin inkhel entu tam turzia chu a mitthla thiam theih. He inkhelah hian Bhaichung Bhutia chuan hattrick siamin East Bengal chu 4-1 in a chakpui a, red and golds-ten heti taka Bhutia an la ngaisang reng hi a chhan i hrethiamin ka ring. 

East Bengal-in coach atan Liverpool legend Robbie Fowler an lalut a, English striker ropui ṭhin hian defender Danny Fox leh winger Anthony Pilkington-te chu Wigan Athletic aṭangin a lalut zui a, right back Scott Neville leh midfielder Aaron Amadi-Holloway-te A League aṭangin a seng lut bawk. 

Birmingham City aṭanga Kolkata club zawmtu Jacques Maghoma 'magic' hi hmuh châkawm zingah a tel a, Hamburg tana Bundesliga khel tawh Matti Steinmann hi kum 25 lek a la ni tih hriat tel a ṭha.

Valencia boss hlui Antonio Habas hnuaiah Bagan hi team insiamrem sa an ni a, an match hmasa berah Kerala Blasters chu 1-0 in an hneh tawh - goal awmchhun khungtu Roy Krishna bawk hi en bik a sual lo ang. Motherwell captain an thlem chhuah midfielder Carl McHugh hi theihnghilh suh.

Kum 29 mi defender Tiri hi Indian football hrechiang sa a ni a, Pritam Kotal leh Sandesh Jhingan-te ho tlarhnungah an awm bawk. 

Mizo tlangval Jeje chu East Bengal-in tlarhmaa chhuanvawr atana an neih a ni a, mahse hliam vanga season hmasa tluan inlan lo Jeje hi zaninah a inlan thei lo mai thei. 

Hnahthial tlangval chuan, "Ka khup hliam hi 100% in a la dam chiang thei lo a, bul ka la ṭan thei lo. Dam lam chu ka pan ve zel a, bench lamah chuan ka awm tawh mai thei," tiin Vanglaini a hrilh.