Lockdown vangin mi maktaduai 3 chuang him phah

Hri leng chungchanga Europe ram 11-te  zirchianna neihah, heng ramte hian Covid-19 vanga khauh taka lockdown an kalpui avangin, mi maktaduai 3.1 chuangin nunna an chan loh phah niin a tarlang. 

European Centre of Disease Control-in a tarlang dan chuan May 4 thleng khan hri leng vanga thi an tam viau tur thu data a tichhuak a, mahse an zirchianna ram Germany, France, Italy, United Kingdom, Spain, Belgium, Austria, Denmark, Norway, Sweden leh Switzerland-ahte  khauh zawka lockdown kalpui a nih avangin thi hi an tlem phah niin Imperial College London-in zirchianna a neihah a tarlang a ni. 

Lockdown kalpui avang hian heng ramah hian hri kai thar hi an tlem phah a, hri kai tlakhniam lam hi khaikhawm chuan 82% a ni. Heng ram tarlan takteah hian khauh takin lockdown kha kalpui lo ta se, May thla khan hri kai hi mi mtd 12-15 an tlin hman rin a ni a, heng ram mipui 3.2-4% chu an kai hman dawn tihna a ni. Zirchianna an neihna heng ramah hian Covid-19 hri hi la leng tho mah se ziaawm lam an pan chho mek a ni.