Group C leh D pe hmasa leh dawn

Mizoram sorkar chuan sorkar hnathawk group C leh D-te hlawh tur siam hmasa phawt turin department hrang hranga drawing and disbursing officer (DDO)-te a hriattir.

Tarlan tawh angin, October 2020 hlawh chu group C leh D-te pek a nih hnuah group A leh B-te pek ve leh a ni. November thla hlawh pawh Finance department thu angin Treasury chuan DDO-te chu group C leh D hlawh tur chauh bill thehlut phawt turin an hriattir a ni.

Vanglaini palai zawhna chhángin Finance hotute chuan, department ṭhenkhata hlawh buaipuitute'n group C leh D hlawh tur bill an thehluh tawh thu an sawi a, "Group A leh B hlawh tur bill thehluh hun tur hriattir kan la ni lo. Hriattirna kan dawn hun hunah kan thehlut ang," an ti.

October hlawh tur kha ṭum dang angin DDO-te chuan group A, B, C leh D tan bill an thehlut a, mahse, Treasury lamin group A leh B-te bill la leta siamṭha leh tura an tih avangin group C leh D tan siam hmasak a ni.