MDC thlanna tur Lawngtlai district-ah Hripui vei 222 hmu tawh, vei mek 83
December 4, 2020-a MDC inthlan neihna tur Lawngtlai district-ah November 25, Nilaini thleng khan Covid-19 vei mi 222 hmuh chhuah a ni tawh. Nimin tlai thleng khan hri vei enkawl mek mi 83 an awm a, Aizawl district tih loha hripui vei mek tamna ber a ni.
Sorkar thuchhuah aṭanga a lan danin, Lawngtlai district-a Covid-19 positive hmuh chhuah tawh mi 222 zinga mi 83 chu enkawl mek an nih laiin, mi 139 chu chhuahtir an ni tawh.
Hripui vei hmuh tawh zinga mi 136 (61.26%) chu Mizoram chhunga kái chhâwng an ni a, an zingah hri kài ṭanna hriat theih loh eng emaw zat an awm. Mi 121 (54.50%) chu tun hnai ni 17 (November 9-25) chhunga hmuh chhuah an ni bawk.
Lawngtlai district-ah hian October 18, 2020 khan tualchhunga kái hmuh chhuah ṭan a ni a, hemi ní hian sikul naupang pahnih hmuh chhuah a ni. Sorkarin a tarlan aṭanga hriat theih chinah, October 18 - November 25 chhungin tualchhunga hripui kái mi 136 an awm tawh a, chu'ng zinga pariat chu LADC MDC inthlana duty tur, polling official atana ruatte an ni.
Lawngtlai district-ah hian tun thla, November 9-25 chhungin tualchhunga hripui kai mi 121 hmuh chhuah a ni a; November 23 kha hmuh chhuah tam ber ní niin, mi 22-in tualchhungah Covid-19 an kai tih hmuh a ni.
September leh October thla chhung khan Lawngtlai district-ah 71 RCC camp-a Border Roads Organisation (BRO) mi leh sa zingah Covid-19 positive mi 26 hmuh a ni a; November 8-ah RDS company hnuaia thawk mi pathum hmuh a ni bawk. An vai hian Mizoram páwn aṭanga rawn lut, Lawngtlai district-a hna thawk tur an ni.
Tun hnaiah Lawngtlai district-ah Covid-19 vei hmuh belh zel a nih avang leh mipui vantlang zinga hri darh zel tur vèn nan leh contact tracing leh test a chak zawk theih nan Lawngtlai DC chuan November 19 khan ni nga chhung atan Lawngtlai khawpui leh Siachangkàwn khuaah partial lockdown a puang a, nimin khan Thingkah khuaah partial lockdown puan ṭan a ni bawk.
Lai Autonomous District Council (Lawngtlai district) chhungah December 4, kar leh Zirtawpni hian MDC inthlanpui buatsaih a ni dawn a; chuta official duty turte chu November 17 khan training neihpui an ni. Polling official tura ruat zingah Covid-19 vei mi pariat an tel a, mi pariatte'n mi danga an kài chhàwn dan erawh hriat theih a ni lo.