Ronaldo goal a tawk lo

Cristiano Ronaldo goal khat hmangin Juventus chuan Lazio lakah hma hruai reng mah se, hun tawp dawnah Felipe Caicedo-a'n si phurh a sut avangin team pahnih hi 1-1 in an inhnehtawk.

Pathianni zan Serie A inkhel dangah AC Milan leh Hellas Verona pawh 2-2 in an inhnehtawk a, table hmahruaitu Milan tan striker Zlatan Ibrahimovic chuan goal a khung chhunzawm zel.

Stadio Olimpico-a inkhelah mualneitu lamin ball chang tamin inkhel an thunun zawk, goal erawh an nei thei mai lo. Minute 15-naah Juan Cuadrado cross chu Ronaldo-a'n goal hmahruai atan a khung.

Portuguese forward hian tun season Serie A match li a khelh aṭangin goal ruk a khung leh der tawh, an chakpui dawn ni pawhin a lang hman. Mahse Simone Inzaghi nauten beidawng loa an nawr rah sengin hun tawp hma chiaha sutin point an hlawh chhuak.

Andrea Pirlo chuan, "Kan khel ṭha em em a, minute 90 chhung kha chuan kan tana hlauhawm pawh a awm meuh lo. Hun tawp hma second 10 vel chauh awm tawha chet sual chu a pawi, chutihrualin kan khelh dan a lawmawm," a ti.

San Siro a inkhelah Verona an che fuh hmasa zawk, mikhual team lamin Antonin Barak hmangin minute rukna lekah goal an khung - Davide Calabria chuan anmahni lamah a ti lut palh bawk.

Verona dinhmun ṭha hman mah se defender Giangiacomo Magnani-a'n anmahni lamah a ti lut palh a, penalty an chawi bawk. Mahse penalty chhuihtu Ibrahimovic-a'n a hlah - Europa League lamah penalty a hlah zo chiah bawk.

Mahse, Ibra-a'n a tih sual siamṭhatna hun a nei, hun tawp hma deuhin season kal laia a league goal riatna tauh lutin a team chu point a hlawh chhuahpui a, table chung berah an awm chhunzawm zel.