Penalty & Valencia ngam lotu Real Madrid

Valencia midfielder Carlos Soler chuan Real Madrid lakah penalty hmangin hattrick a siam a, an mikhual Spanish champion hi 4-1 in an sawp!

Real defender Raphael Varane chuan anmahni lamah a ti lut bawk a, inkhel ṭantir lama Karim Benzema goal khung chu hun a tawp meuh chuan mualpho khuhna chauh a chang. 

Zinedine Zidane-a nauten hnehna an chan zawh loh avangin palinaah an chhuk thla a, inkhel danga 2-0 a Granada hnehtu Real Sociedad chu table chung ber luahtu an ni.

Valencia khelmualah Real-in minute 23-na lekah goal hmahruai an khung a, goal khungtu pawh ṭum dang ang bawkin Benzema a ni. 

Mahse, French striker-in goal a khung hnuah Real an hlauhawm hleithei lo a, minute 35-naah Lucas Vazquez-a'n a kuta ball a tawh fuh avangin penalty an chawi.

Valencia tana Soler-a penalty chu Thibaut Courtois-a'n a dang a, a let lehlam hi Soler-a'n post a tih per - a per let changtu Yunus Musah chuan goal-ah a chantir a, mahse video assistant referee (VAR) hmanga enfiah a nih hnuah penalty pet hmain area-ah Musah hi a awm avangin penalty pet nawn a ni. 

Kum 23 mi Soler-a'n penalty a pet nawn a, Courtois-a'n a dang nawn tawh lo. Valencia hlauhawm zui lo mah se Varane chuan an khingpui goal khat a 'khilai' a, chawlhlawkah Valencia-in 2-1 in hma an hruai. 

Second half-ah thawnthu a danglam lo. Valencia-in penalty vawi hnih dang an hmu a, Soler-a'n goal-ah chantir ve vein an chak chiang - La Liga-a penalty hmanga hattrick siam thei pathumna a ni. 

Valencia-in an goal thumna an khung hian minute 63 a ni a, Real-in 'comeback' theihna hun la nei mah se khualmualah point thum an hlawh chhuak zo lo.

Sociedad-in Granada lakah minute 27 chhungin Nacho Monreal leh Mikel Oyarzabal (penalty) hmangin goal hnih an khung a, an chak. 

Minute 86-naah Sociedad defender Robin le Normand chu hnawhchhuah a ni a, penalty-a chawi bawk. Mahse, Granada striker Darwin Machís chuan penalty hi a hlah. Granada tana inkhel bul a ṭan vawi khat naah kum 18 mi goalkeeper Angel Jimenez chuan Willian Jose-a penalty a dang  ve bawk. 

Granada player 10 ngawt chu inkhelh hma hian Covid-19 an kai tih hmuhchhuah a ni a, inkhelh hun sawn an dil. Mahse, league danah first team player pasarih khel tur an awm chuan inkhel kaltlangpui tur a ni a, an dilna hnawlsak an ni - reserve leh youth team player nen an khel a, an tlawm.