Villa lakah Arsenal an mualpho

Arsenal chu an mikhual Aston Villa lakah 3-0 in an tlawm. Manchester United laka hnehna chang hlim Mikel Arteta naute hi an phur vanglai takin an mual Emirates Stadium chhungah ngei an mualpho.

Gunners rawlthar duhawm Bukayo Saka chuan anmahni lamah a ti lut palh a, Liverpool laka hattrick siamtu Ollie Watkins chuan goal hnih khung bawkin Villa an chak chiang hle.

Inkhel dangah Leicester City chuan Jamie Vardy penalty hmangin Wolves 1-0 in an hneh a, manager Brendan Rodgers naute hian point 18 hmuin Premier League hmahruaitu an ni, an hnuaiah point 17 nei Tottenham leh Liverpool an awm.

Pathianni Premier League inkhelah Arteta-a'n Man United laka bul ṭantute bawk inkhel bul a ṭantir leh a, beisei an nei sang. Mahse Old Trafford angin an tlarhnung a phui tawh lo a, goal khung turin an vannei nawn tawh lo bawk.

Jack Grealish siamsak chu Ross Barkley-a'n a duh tawka petin a khung, offside vanga hnawlsak a ni hlauh. Gunners an inveng seng lo, defender Matt Targett-a cross chu box chhunga Gunners player pariat ngawt awmin an dang thei lo, an lamah an ti lut!

Goal hnihna luh danah pawh Arsenal an mualpho, box chhungah player pasarih ngawt awm mah se Villa player pahnih Barkley leh Watkins ten an hrem thei tho. Grealish chuan keeper Emiliano Martinez hnen aṭanga a ball hmuh chu chak taka tlan puiin Watkins tan a siamsak leh bawk.

Fak phu Villa

Villa manager Dean Smith chuan, "Arsenal mualah inkhelh a harsa tih kan hria, mahse ka naute an khel ṭha hle. A bik takin Jack Grealish, Ross Barkley, Trezequet leh Ollie Watkins te khan an taimakna leh thiamna hmangin hun ṭha tam tak an siam thei," a ti.

Smith enkawlna hnuaiah Villa hian beisei aia ṭhain season bul an ṭan, champion Liverpool bakah Leicester City an hneh tawh bawk. Match sarih an khelhah point 15 hmuin, anmahni aia match khata khel tam leh hmahruaitu Foxes an phak lohna chu point thum chauh a ni.

Arsenal manager Arteta chuan, "Keini aiin hnehna chan an duh zawk, a chhan ber pawh ka hre mai lo. Training-na hmuna kan rilru put ang kha a ni ta lo," a ti. North London club hian season thara Champions League khelh an tum chuan hmasawn an mamawh hle.