Paris Masters champion Medvedev

Daniil Medvedev chuan Alexander Zverev chu 5-7, 6-4, 6-1 a hnehin Rolex Paris Masters title a la a, Russian player zingah Paris Masters champion ni thei palina a ni.

Pathianni zan final hmuhnawm takah player pahnih an inhlau lo tawn hle. Rafael Nadal hnehtu Zverev-a'n set la hmasa mah se darkar hnih leh minute sarih an inkhelh meuh chuan seeded pathumna Medvedev zawk a ding chang.

Player pahnih hi vawi sarih an intawnna niin, German player Zverev hi ṭum hnih a chak lohna chiah a ni. A chak loh erawh a pawi thei hle - 2019 Shanghai Masters final khan a ngam lo, tun ṭumah pawh nomawi inchuhna inkhelah bawk a tlawm.

Kum 24 mi Medvedev chuan, "Paris Masters khelh hma khan season ka hmang chhe hle, tun season chhung final khelh pawh ka nei miah lo hial a nih kha, tunah chuan a tawp lamah lawmna tur ka tawng ve ta.

"Paris Masters khelh ṭan dawn kha chuan rinkai ka ni lo, nimahsela beiseina sang tak nen inelna ka hmachhawn. Hard court a nih avangin ka tan chuan nuam ti taka inkhelh theihna hmun a ni," tiin a sawi.

Russian tlangval Medvedev hi hard court a inkhel thiam a ni a, court dangah erawh beisei a phak lo deuh ṭhin. Season tawpa a thiam pariat inelna ATP Finals atan a tling tawh a, O2 Arena a inelna neih turah beisei a nei sang ang.