Tripura chanchinbu Copy 6,000 dawn pawtthler

Tripura tualchhung chanchin­bu, 'Pratibadi Kalam' chuan Agriculture department-a cheng vaibelchhe 150 tihchingpen chungchang a chhuah avangin district pathuma thawnchhuah tur, copy 6,000 dawn chu a phurtu motor aṭangin mi ṭhenkhatin la thlain Udaipur-ah an pawthlera an hal vek a ni. 

Tripura police director general in-charge, Rajiv Singh chuan chanchinbu copy tam tham tak tihchhiat a nih chungchangah Radhakishorepor police station-ah complaint thehluh a nih thu sawiin, mawhphurtute chhui mek an ni tih a sawi. 

Pratibadi Kalam editor, Anol Roy Chowdhury chuan agriculture scam chungchang hi chanchinbuah hian ni thum an ziak a, thil dik lo tihnaa inhnamhnawiha puh zinga tel, agriculture minister Pranajit Singha Roy hming pawh tarlan tel a nih thu sawiin, hei vang hian an chanchinbu hian beih a tawk ta niin a sawi. 

He thil thleng chungchangah hian Agartala Presss Club secretary kalchhuak tur, Pranab Sarkar leh president kalchhuak tur Subal Kumar Dey leh midangte chuan police headquarters-ah DIG Soumitra Dhar an hmu a, thil dik lo titute chu man chhuak ngei tur leh, na taka hrem an phut tih an hrilh.