Manipur-in sorkar hna-thawk ṭhate chawimawina tur siam

Manipur sorkar chuan an state-a sorkar hnathawk ṭhate chawimawina tur, 'Scheme for Chief Minister's Award for Good Governance' a siam thar. 

He scheme hnuaiah hian sorkar hnathawk, an hna thawhna kawnga thawk ṭha, mipui leh stakeholder tam takin an chhawr ṭangkai phah turte chu chawimawina hi hlan a ni dawn a ni. 

Award hi kumtinin mimal emaw, team emaw hnenah hlan a ni ṭhin dawn a, chawimawina hian mimal tan pawisa fai cheng nuai khat leh, group category tan cheng nuai hnih a keng tel ang. 

Statehood Day, Republic Day emaw Independent Day-ah emaw he chawimawina hi hlan a ni ṭhin dawn a, a hlan hun tur chu chief minister-in a rel ṭhin dawn a ni.