AIFF leh Japan Football Association thawk ho dawn

All India Football Federation (AIFF) leh Japan Football Association (JFA) te chuan February 24 khan thawh hona thuthlung an ziak.

Thawhhona thuthlungah hian AIFF aiawhin president Praful Patel chuan hming a ziak a, JFA aiawhin president  Daini Kuniya-a'n a hming a ziak bawk.

AIFF president Praful Patel chuan, "JFA nena thawhhona thuthlung kan ziak thei hi ka lawm takzet a ni. Kawng thui tak kal tur kan la nei a, kan Japanese ṭhiante'n min pui hi ka lawm hle. Japan hi India tan chuan entirna ṭha tak an ni. Football-a hma an sawn dan hi India tan pawh entawn theih a ni" a ti.

Praful Patel chuan sawibelhin, "2017 FIFA U-17 World Cup thleng tura thlan kan ni a, Club World Cup leh Under 20 thlen dil turin kan inpuahchah leh mek a ni," tiin a sawi.

AIFF leh JFA te hian coach education, grassroots leh hmeichhe football-ah te thawk ho turin remna thuthlung hi an ziak a, Age level-ah exhange programme hman ṭhin a ni bawk ang. A bik takin India Under 17 team te chuan training nei tur leh tournament khel ṭhin turin Japan hi an pan ang. India-in FIFA under-17 World Cup kum 2017-a a thlen tur atana inbuatsaihna atan ruahmanna hi siam a ni.


Share this Post

Login to comment
No Comments