League Cup champion Man City

Manchester City chu Pep Guardiola hnuaia lungthu kim nan Carabao Cup-ah an champion. Pathianni zan khan Aston Villa 2-1 in an hneh a, Sergio Aguero leh Rodri ten an khung.

Season liam ta khan Man City hi tualchhung nomawi pathum Premier League, FA Cup leh League Cup-ah an champion vek a. Kuminah pawh City hian nomawi chawi theih hmasak ber League Cup nomawi chawi nghalin FA Cup-ah beisei tur an la nei bawk. Premier League-ah City hian Liverpool lakah an lallukhum an chan ngei dawnin lang mah se Champions League an la beisei avangin kum ṭhat kum a la ni thei tho.

Bul ṭan ṭha City 

Man City-in Premier League-ah final-a an hmachhawn Villa hi 6-1 leh 3-0 in an sawp tawh a, champion tura rinkai an ni. Villa-in chance ṭha nei hmasa mah se Man City-in inkhel thununin goal pawh an khung hmasa zawk.

Minute 20-naah Raheem Sterling-a'n vei lamah khalh pheiin Ilkay Gundogan a pe a, Germany international hian box chhungah vawrh lutin Phil Jones-a'n a tauh let a, Aguero-a'n mawi zetin a volley goal. Man City goal hmasa berah hian Pep Guardiola naute thiamzia a lang.

Man City khel a mawi zui a, vei lam aṭanga Oleksandr Zinchenko ball vawrh chu ding lamah Foden-a'n a la thla nalh a, mimal theihna sanzia a lang. Villa-in champion lai an khan lo a, minute 30-naah Gundogan corner pet chu Rodri-a'n a tauh goal.

Aston Villa-in first half-ah goal khat an chhang let a, beiseina thar an neih phah. Minute 41-naah City defender John Stones a tawlhthluk avangin  Anwar El Ghazi-a'n vei lamah ball ṭha a lalut a, box chhungah ball ṭha cross zuiin Mbwana Samatta-a'n a tauh goal.

Second half-ah Man City bawkin inkhel an thunun a, goal an khung loh bakah an inkarah goal khat chauh a awm avangin nuam sain Pep Guardiola hote an awm thei lo. Rodrigo leh Bernardo Silva ten chance ṭha an hlah a, Stones chetsual vangin hun tawp thlengin City an hlauthawng.

Minute 88-naah Conor Hourihane ball vawrh chu Bjorn Engels-a'n tauhin keeper Claudio Bravo-a'n dang hmanin goal ban a per hnuah a chhuak. Inkhel thunun siin City an him hram a, 2-1 in an chak.

Man City manager Pep Guardiola chuan, "A zawna vawi thum champion hi hlawhtlinna ropui tak a ni a, kan tlo tih pholanna niin ka chhuang takzet. Inkhel bul ṭantirh leh a tawpah talbuai deuh mah ila a bakah zawng chuan kan khel ṭha hle a ni," tiin a hlawhtlinnaah a lawm thu a sawi.

An hlawhtlinna ropuizia sawi chhunzawmin Pep chuan, "Nomawi kan chawi ṭantirh aṭang khan inelna pakua kan telna aṭangin pariatah kan champion. Eng club mahin hetiang hian English football hi an la thunun ngai lo. 80s hun laia Liverpool-in an thei lo a, Sir Alex Ferguson-a enkawl Manchester United bakah Jose Mourinho leh Arsene Wenger te pawhin Chelsea leh Arsenal an enkawl laiin an ti thei lo," tiin a sawi.

Team ṭha an nih thu sawi langin Guardiola chuan, "Tun hma zawng chuan Europe inelna lianah Madrid-a hnehna kan chan ang kha kan ti thei ngai lo. Chutihrualin first leg-a kan hnehna chan avangin quarterfinal kan lut ngei dawn ka tihna a ni lo a, amaherawhchu chak inring chungin Madrid kan pan. Tuna kan rilru put hmang ang hi season tawpa nomawi pahnih khat kan chawi aiin a hlu zawk," tiin a team-te an puitlin tawh thu a sawi.

Guardiola hnathawh a ropui

•    Pep Guardiola enkawl Manchester City chu season thum chhung a zawnin League Cup-ah an champion a, an tluk loh awmchhun chu Liverpool an ni a. Reds hian 1980-81 leh 1983-84 chhung khan season li chhung a zawnin nomawi an chawi.

•    Manchester City hian League Cup vawi sarih an champion-na a ni a, heng zinga panga hi 2013-14 leh a hnu lama an chawi a ni. Liverpool chu vawi riat an champion tawh a, Reds nomawi chawi hnuhnun ber erawh 2011–12 season 

a ni thung.

•    Guardiola hi League Cup vawi thumah a champion a, amah aia nomawi chawi tam chu vawi li champion Alex Ferguson, Brian Clough leh Jose Mourinho te an ni.

•    Guardiola hian top flight final vawi 25 a khelhah vawi 21 a chak a, heng zinga paruk hi Man City a enkawl laia lak a ni. City hian Community Shield vawi hnih, League Cup vawi thum leh FA Cup vawi khat a ni.