Album pasarih Billboard 200 chart-a No.1 nihpui thei Justin Bieber

Justin Bieber chuan a album thar 'Changes' chu Billboard 200 chart-ah No.1 a nihpui leh ta a, US-ah chuan kar liam ta chhung khan equivalent album unit 2,31,000 a hmu chhuak niin Nielsen Music/MRC Data chuan a tarlang.

Kum li lai album a tihchhuah tawh loh hnuah Justin Bieber hian Valentine's Day khan 'Changes' hi a tlangzarh a, 2015-a a tihchhuah 'Purpose' hnua a tlangzarh leh hmasa ber a ni. A tlangzarh aṭang khan streaming service hrang hrangah stream a hlawh nghal hle a, single a tihchhuahte pawhin YouTube-ah pawh thlir an hlawh hle.

Justin Bieber hian Billboard 200 chart-a No.1 nithei album pasarih a nei ta chiah a, hetiang dinhmuna ding thei naupang ber a ni. Kum 25 (March 1-ah kum 26 a tling ang) chiah la ni mah se a album pasarih lai chu Billboard 200 chart-a No.1 a ni thei a, hei hian JB-a mi 'bik' a nihzia a tilang chiang awm e.  

Elvis Presley khan kum 26 leh thla 11 mi a nih laiin a album pasarih chu No.1 a lo nihpui thei tawh a, kum tam tak a liam hnuah Justin hian a rawn khum ta chiah a ni. A group ang erawh chuan The Beatles kha record neitu an la ni tho a, solo artist ang erawh chuan Justin Bieber hian record a siam ta thung a ni. The Beatles khan an album pasarih No.1 an nihpui khan an band member upa ber Ringo Starr chu kum 25 leh thla ruk chiah a la ni thung. George Harrison chu kum 22 leh thla 10 chiah a la ni bawk.