Angaihtei Hnialum 'Ka nun I tan ka pe' a mawi ber
Ṭhazual Fakna chart-ah Angaihtei Hnialum hla 'Ka nun I tan ka pe' chu pakhatna a ni a, Fiona Lalmalsawmi 'Kristaa lawmna' chu pahnihna niin Miriam Lalnundiki 'Lawmna Hla' chu pathumna a ni bawk.
No.1-ah 'Ka nun I tan ka pe'
Angaihtei Hnialum-in thiam taka a sak 'Ka nun I tan ka pe' Manuna Lianhna phuah a ni. YouTube-ah chuan February 11 khan thlir leh ngaihthlak theiha dah chhuah chauh a ni a, a video hmuh a nuamin a hla pawh a ṭha hle a, Pathian hmangaihna mihringte'n kan rulh zawh lohzia leh chumi avanga kan neih hlu ber 'Kan nun' Pathiana taka pe mai tur kan nihzia tarlanna hla ṭha tak a ni. Music Video hi RDS Shot kut chhuak a ni a, Princeton Records-ah recording tiin, music hi Tetea Forte kut chhuak a ni bawk.
Chart hmasaah khan pathumna a ni a, tun ṭumah erawh pakhatnaah a rawn invawrh ta a ni. Chart-a a lanna la rei lo mah se hma a sawn chak hle a, thla hnih chhung velin pakhatna dinhmun a rawn luah hman.
Fiona-i'n hma sawn chak
Chart hmasaa pangana Fiona Lalmalsawmi 'Kristaa lawmna' chu pahnihnaah a rawn invawrh a ni. He hla music hi jazz lam hawi a ni a, a dinhmun a rawn sawh nghet chak hle a ni.
Miriam Lalnundiki 'Lawmna Hla' chu pathumnaah rawn inhlangkai a, ani pawh hi chart hmasaah khan parukna a ni. Tun chart-ah erawh pathumnaah a rawn inhlangkai der a, hma a sawn chak hle bawk.
Pakhatna pawh lo ni tawh R Lalruatsangi 'Chanchinṭha hril' chu palinaah a awm ve thung a, C Lalenkawli chuan a hla 'Aw I hmangaihna' hmangin Top 5 a khar a ni.
Ṭhazual Fakna Top 10
1 Angaihtei Hnialum - Ka nun I tan ka pe
2 Fiona Lalmalsawmi - Kristaa lawmna
3 Miriam Lalnundiki - Lawmna Hla
4 R. Lalruatsangi - Chanchinṭha hril
5 C. Lalenkawli - Aw i hmangaihna
6 One In Christ - Zing Daifim
7 Rintea ft Hmingpuia - Ka lawm zel ang
8 Ruthi CVL Muanpuii - Lalpa nang hnaih zel hi
9 Manuni - Eng ka hmu ta
10 Mawitea - Chibai ka buk che