Leimin vanga in ṭhiah ngai sorkarin a ṭhiat thei

Disaster Management & Rehabilitation (DMR) minister Lalchamliana chuan ZPM member Vanlalhlana zawhna chhangin, leimin vanga in ṭhiah ngai a awm chuan danin thuneihna a pek angin sorkarin a ṭhiah theih thu House a hrilh.

DMR Minister tarlan danin, DM Act, 2005-in thuneihna a pek angin in him lo, mipui vantlang tana hlauhawm leh chhiatna thlen theite chu State Executive Committee remtihnain ṭhiah theih a ni. Chhiatrupna a thlen laiin structure him lo, mipui vantlang tana him lo leh chhiatna tipunlun theite chu DM Act, 2005-in thuneihna a pek angin District Disaster Management Authority-in a ṭhiat thei bawk.

ZPM member Vanlalhlana'n a bial chhung, Bawngkawna leimin avanga mimal pakhatin dinhmun hlauhawm taka ding chu thuneitu lamin ṭhiat tura an nawr reng thu leh in ṭhiahna tur a nei si loh avanga a buai thu a sawi chungchangah Lalchamliana chuan, "He in ṭhiahna atana hian ruahmanna siam a ni a, estimate pawh cheng nuai 5.40 siam a ni," a ti.

Lalchamliana sawi danin, Mission Veng khamphei chu a min zel lohna atan a venna tur siam tum a ni a, mahse ruahmanna siam chhinah cheng nuai 100 chuang a ngaih dawn avangin ṭhulh hrih a ni.

DMR Minister chuan, chhiatrupna laka invenna lam Mitigation Fund-ah sum an neih tlem thu sawiin, "Cheng nuai 504 kan dil a, nuai 201 min pe a, a beitham hle. State Disaster Respond Fund (SDRF) hnuaiah kum tin cheng vbc. 20 min pe a, guideline a strict hle," a ti a; SDRF-ah hian sorkar kum tharah cheng vbc. 47 an dawn dawn avangin a ziaawm deuh tur thu a sawi.