Qatar GP an ṭhulh

China rama hri leng 'coronavirus' chuan buaina a thlen chhunzawm zel. March 8-a neih tur MotoGP Qatar Grand Prix chu hri leng vang hian neih theih a ni dawn lo.

Covid-19 vang hian China chauh ni loin Europe pawh an buai mek, a bik takin Italy chu a buai zual an ni. MotoGP rider inelna hmachhawn tur zinga paruk ngawt chu Italian an ni a, team ṭhenkhat pawhin Italy hi innghah nan an hmang.

Qatar lam hian an ram zin lut tur an endik uluk thei hle a, tun hnaiah phei chuan Italian mite tan harsatna a awm hial; hei vang hian inelna hi neih theih a ni dawn lo. Moto2 leh Moto3 te erawh enchhinna an neih tawh avangin kaltlang pui theih beisei a ni.

MotoGP thuneitu lam chuan thuchhuah siamin, "Italy hian rider championship leh team championship lamah mawhphurhna pawimawh tak an nei a, anni hian Qatar kal tura harsatna an neih avangin inelna chu neih a ni dawn lo," an ti. BBC Sports-in a tarlan dan chuan khawvel pumah hri vei hi mi 86,000 an awm tawh. Italy-ah hian football inelna Serie A pawh ruahman lawk angin an kal thei lo a, an ram hmar lamah phei chuan school leh college te pawh khar a ngai hial.

MotoGP thuneitu lam chuan sawi zawmin, "Ram ṭhenkhat pawhin Qatar lut tur hian harsatna an tawk, tun hnaiah phei chuan Italian khual zinte hi Qatar an thlen hnuah a rei lo berah ni 14 chhung en chhin zel phawt an ngai," tiin Italian mi ten harsatna an tawh thu an sawi.

Bike intlansiakna sang ber hi round hmasa lam an neih theih dawn loh takah chuan season an ṭan hun a tlai dawn tihna a ni. March 22-a tlan tur Thailand Grand Prix pawh hri leng avang hian tlan theih a ni dawn lo tih a chiang a, inelna dang pawh a nghawng ang.