Horticulture-in rua lak luh a la nei lo Mau/rua hi mipuite intodelhna tura ruahman a ni - Dy. CM

Chief Minister a awm loh avanga a aiawha zawh­na chhangtu deputy chief minister Tawnluia chuan, Horticulture department-in rua lâk luh a la neih loh thu a sawi a, "Mau/rua hi mipui intodelhna tura ruahman a ni," a ti.

Congress Legislature Party (CLP) leader Zodintluanga'n Chief Minister-in Assembly session hmasa lama a sawi tawh rua lak luh tawh zat a zawhna chhangin Tawnluia chuan, "Horticulture department-in department ang chuan rua lak luh a la nei lo a, mimalin a sing tél chu an la lut," a ti a, department-in rua a la lei loh avangin a la luttute leh a supply-tu official-a an la hriat loh thu a sawi.

Deputy Chief Minister chuan, rua atana sum sen zat zawhna chhangin, "Department-in sum engzat mah a la séng lo. Rua hi Mizoram chhung, a theihna apiangah chìn tura ruahman a ni," a ti.

Zodintluanga chuan, House-ah rua chu House Leader-in sorkar hmalakna anga a sawi laia department-in a hriatpui lo chu pawi a tih thu sawiin, "Rua leh mau hi a thu chauhin nge, a takin an ngai pawimawh tih ka zawt duh," a ti a; rua leh mau chungchang chu Chief Minister budget speech-ah pawh tarlan a nih loh thu a sawi.

INC member C Ngunlian­chunga pawhin Horticulture department-in sum sèn a neih loh thua zawhna chhàn a nih laiin, supplementary demand-ah National Bamboo Mission hnuaiah cheng nuai 350 leh Hmunpui khuaa model plantation siamna atan cheng nuai 131 dah a nih thu tarlan a ni tih House a hrilh.

Tawnluia chuan, rua/mau chu an ngaih pawimawh leh chìn ngei tur a nih thu sawiin, "Mipuite intodelhna tur atana ruahman a ni. A thu mai ni lo, a takin bawhzui a ni. Mau/rua chìn tur hi uluk taka thlan a ni a, kan rama la awm ngai lo, a ṭha ber tur ngaihtuah a ni," a ti.

Deputy Chief Minister sawi danin, Mizorama chìn atan sorkar chuan raw chi hnih - Brandisii leh Latiforus a thlang a, Mizoramah a awm loh avangin a chî siam thiam zawn a ni a, Tamil Nadu-a company pakhat thlan a ni. Mimala ti thei turte chu company nena indawr tur thlan an awm tawh.

Hmunpui ram hectare 250-a zauah modern plantation siam a ni dawn a, Hmunpui leh Lengpui aṭangin mi 280-in rua/mau chìn an thlang tawh a ni.

Hetih lai hian ZPM member Lalchhuanthanga zawhna, 'Mau chi ṭha hardening turin nursery-ah engzat nge phun a nih tawh' tih chu Horticulture changtu chief minister Zoramthanga chuan, 'Department-in phun a nei lo' tiin a chháng.