SC-in Article 370 ngaihtuah tura dilna hnawl
Supreme Court-a judge panga awmna bench chuan nimin khan nikuma sorkar laipuiin Jammu and Kashmir special status pekna, Article 370 a tihtawp chungchang bench lian zawka ngaihtuah tir tura dilna (petition) chu a hnawl.
Nimin khan Justice NV Ramana kaihhruai, judge panga awmna bench chuan Article 370 titawp a nih chungchang, judge pasarih awmna bench-in ngaihtuah tura dilna thehlutte chu hnawlin, ngaihtuah ṭul a ti lo tiin thutlukna a siam. Court-ah hian petition thehluttute aiawhin Dinesh Dwivedi, Rajeev Dhawan leh Sanjay Parikh-te pawh an inlan ve bawk.
Sorkar laipuiin nikum August 5-a a tihtawp tak, Article 370 chungchang ngaihtuah tura court-a dilna hi thehluttu an awm nual a ni. People’s Union of Civil Liberties (PUCL), Jammu and Kashmir High Court Bar Association bakah, sorkar hmalakna hian India ram constitution a kalh tizawnga hmala ten SC-ah hian petition hi an thehlut a ni. Article 370 tihtawp chungchang ngaihtuah tura court-a dilna hi January 23 khan SC-a judge panga awmna chuan hun danga ngaihtuah turin a lo sawn tawh bawk.