CM pawisa sawi hmuh tur a awm lo - Zodintluanga

Congress Legislature Party (CLP) leader Zodintluanga, MPCC treasurer ni bawk chuan, chief minister Zoramthanga'n Covid-19 dona atan sum tamzia a sawi chu a taka hmuh tur a la awm lo niin a sawi a; hripui lènlaiin ama bial bak ngaihsak loah CM a puh.

Zodintluanga chuan thuchhuah siamin, Covid-19 lènlai chu politics-a inbeihna hunah ngai loin theihtawpa sorkar puiin, thil fel loah pawh ngawih an chuh tih a sawi a; mahse, tun hnaia chief minister-in ama bial bik ringawt a ngaihsak chu Chief Minister a nih miau avangin ngawihbopui theih a nih loh thu a tarlang.

CM Zoramthanga'n Covid-19 dona atan sum a tamzia a sawi chungin a takah hmuh tur a awm lo tih sawiin Zodintluanga chuan, "Task force, NGO, police, etc. te an himna tur hmanrua pek an ni lo. Khawiah nge CMin Covid-19 do nan pawisa bithliah awm lo (limitless) a tihte kha, hman a va hun tawh ve. Bial pakhat chauha buhfai sema buai tawk ni lo, ram tana pa nih tling, thingtlang mi harsa berte hnen thleng phak khawpa inpe leh ngaihtuahna séng kan mamawh a ni," a ti.

CLP Leader chuan, "Hun harsa kan hmachhawn mek lai hian ram hruaitu lu ber leh a thawhpuite lakah mipui kan innghat leh zual. Rorel laite nena thawkhoa inṭawiawm hun lai a ni kan tih mek laiin, kan ram hruaitu lu ber CM Pu Zoramthanga chuan ama biala local task force tan Rs. 1,20,000 lai a sem thu sorkar thuchhuakah kan hmu a, hei hian mi tam tak mak tih leh beng a tihthlep rualin a vawi khatna a ni a, 'Ama bial ta chauh a ni lo tih a hre ve mai ang' tia kan thlir laiin, March 31, 2020 mai khan a bial chauh tan buhfai bag 170 lai a sem leh a ni," a ti a; bial pakhat buaipui tâwk CM a ni chu vanduaithlak a tih thu a sawi.

Zodintluanga chuan, "Ani chauh ni lo deputy CM Pu Tawnluia pawhin a bial tan chauh buhfai a sem bawk. Hetianga ram pumin hun khirh leh harsa ber kan tawh mek laia anmahni 'survival' ringawt ngaihtuaha mahni bial bil tana thil an ti hi mipui min hmusit a ni," a ti. Tun hnaia Lunglei district an tlawhnaah mipui an harsa hle tih a hmu tih sawiin Zodintluanga chuan, "Mizoram CM a ni a, Mizoram hi hripui lakah hian a dam khawchhuah theihna turin theihtawp chhuah tur a ni," a ti a; mipui harsate ngaihsak loa CM berin ama bial bil a vil chu a dem thu a sawi.

MPCC Treasurer chuan, CM leh Dy CM-te'n an bial buhfai an sem chu, "Buhfai khati zozai kha khawia mi nge an sem? Eng pawisain nge an lei? Hetianga anmahni chauh inngaihtuaha an sem theih tho si chuan eng vangin nge chhuanchhama awm mai tur harsa zawkte hnen hi an thlen theih loh?" a ti bawk.